ភ្នំពេញ: ឌួង ហ្សូរីដា បានខឹងយ៉ាងខ្លាំងនឹងអ្នកដែលបង្កើតពាក្យអាស្រូវចំពោះនាងម្ដងហើយម្ដងទៀត ដោយមិនដឹងថាគេមានបំណងអ្វីលើនាង។
ដោយសារចេះតែមានលេចឮខ្ចរខ្ចាយពាក្យអាស្រូវជាបន្ដបន្ទាប់នោះ បានធ្វើឲ្យពិធីការិនី និងជាប្រធានក្រុមបង្ហាញម៉ូដ ឌួង ហ្សូរីដា កើតការមួម៉ៅក្ដៅចិត្ត និងងឿងឆ្ងល់ថា តើពេលណាទើបគេឈប់បង្កើតរឿងពាក្យចចាមអារ៉ាម ដែលធ្វើឲ្យប៉ះពាល់ដល់កិត្តិយស និងអារម្មណ៍នាង។
ថ្មីៗនេះ បានលេចឮពាក្យចចាមអារ៉ាមថា ឌួង ហ្សូរីដា ជា "ម៉ែយ៉ែម" នាំសមាជិកក្រុមម៉ូដែលឲ្យតាតាដែលសម្បូរប្រាក់។ ពាក់ព័ន្ធរឿងអាស្រូវនេះ ហ្សូរីដា បានអះអាងថា នោះ គឺជាការនិយាយបំផ្លើស។ តែនាងក៏ត្រេកអរដែរ ព្រោះដោយសារតែគេល្បីដូច្នេះហើយ ទើបមានគេស្វែងយល់ពីនាង និងក្រោយពីដឹងថា នាងគ្មានពាក់ព័ន្ធដូចការចោទប្រកាន់នេះ ធ្វើឲ្យគេកាន់តែអាណិតនាង ព្រមទាំងអញ្ជើញក្រុមបង្ហាញម៉ូដនាងបានចេញបង្ហាញជាហូរហែ។ នេះបើតាមទស្សនាវដ្ដីប្រជាប្រិយ លេខ៥៦៦ ចេញថ្ងៃ១-១០ មិថុនា ២០១២។
គួររម្លឹកឲ្យដឹងថា កាលពីឆ្នាំ២០០៩ ឌួង ហ្សូរីដា ជួបរឿងស៊យ ដោយមានជនខិលខូចយករូបថតរបស់នាង ភ្ជាប់ជាមួយតម្លៃខ្លួនផង ដាក់ឃោសនាលាក់លៀមតាមរង្គសាលមួយចំនួន ហើយករណីនេះក៏បានស្ងប់ស្ងាត់ក្រោយពី ហ្សូរីដា សហការជាមួយប៉ូលិសបំបែកសំណុំរឿងនោះ៕
Source : cen
