លោក ដាន បារ៉េត អ្នកគ្រប់គ្រងសហគមន៍សម្រាប់កំណត់ត្រាពិភពលោកហ្គីណេសបាននិយាយក្នុងសេចក្តីថ្លែងការណ៍មួយថា "ដោយបានក្លាយជាវីដេអូដែលគេសួរថា 'តើអ្នកបានឃើញវាហើយឬនៅ?' ក្នុងរយៈពេលពីរខែចុងក្រោយនៅពេញទំព័រវិបសាយនោះ វាពិតជាអស្ចរ្យណាស់ដែលមានលទ្ធភាពប្រគល់ឯតទគ្គកម្មសម្រាប់វីដេអូដ៏ពេញនិយមបំផុតមួយនេះ" ។
មុនបទចម្រៀង Gangnam Style បទ Party Rock Anthem របស់ LMFAO ធ្លាប់ជាវីដេអូចម្រៀងដែលគេចូលចិត្តបំផុតជាមួយនឹងការចូលចិត្តរហូតដល់ ១.៥៧៦.៥៧៨ នាំមុខបទ Baby របស់ Justin Bieber ជាមួយនឹងការចូលចិត្តចំនួន ១.៣២៨.៩១៤ និង បទ Rolling In The Deep របស់ Adele ជាមួយនឹងការចូលចិត្តចំនួន ១.២៤៧.០៣០ ។
លោកបារ៉េត បាននិយាយថា "ក្នុងឆ្នាំកន្លងទៅ គេមិនដែលនឹកស្មានថានឹងមានវីដេអូដែលអាចត្រូវគេបើកមើលរហូតដល់ ១០០ លានដងនោះទេ ហើយឥឡូវបទ Gangnam Style បានសម្រេចបានលើសពីចំនួននេះរហូតដល់ទៅជាងពីរដងក្នុងពេលត្រឹមបីខែប៉ុណ្ណោះនៅលើ YouTube ។ បទចម្រៀងវីដេអូនេះមានអ្នកបើកមើលលើ YouTube ចំនួន ២៣០ លានដង និង កំពុងតែបន្តមានអ្នកបើកមើលថែមទៀត ។
ងាកទៅមើលថៃឯណោះវិញ ការប្រកួតរាំយ៉ាងសប្បាយរវាងក្រុមបងធំនៅក្នុងប្រទេសថៃបានប្រែក្លាយទៅជាឧបត្តហេតុ នៅពេលដែលស្ថានភាពបានប្រែទៅជាក្តៅគគុករហូតឈានដល់ការបាញ់បោះគ្នា នោះបើយោងតាមព័ត៌មានក្នុងស្រុកមួយរាយការណ៍កាលពីថ្ងៃអាទិត្យ ។
ក្រុមបងធំទាំងពីរបានស៊ីផឹកនៅភោជនីយដ្ឋានតែមួយនៅក្នុងបាងកកកាលពីថ្ងៃសុក្រនៅពេលដែលសមាជិកដែលសុទ្ធតែជាពួកស្ទាវរបស់ពួកគេបានចាប់ផ្តើមប្រកួតគ្នារាំក្បាច់ជិះសេះរបស់បទ Gangnam Stye របស់តារាចម្រៀងកូរ៉េ PSY ។ ការប្រកួតគ្នារាំភ្លាមនោះបានប្រែក្លាយជាជម្លោះដ៏ក្តៅគគុក ហើយសមាជិកម្នាក់នៃក្រុមបងធំមួយក្រុមបានចាកចេញពីហាងផឹកស៊ី ដើម្បីហៅគ្នីគ្នាមកថែមទៀត ។
យុវជនម្នាក់បានប្រាប់កាសែតបាងកកប៉ុស្តិ៍ថា "មនុស្សបួននាក់ពីក្រុមយូកូងមួយក្រុមបានវិលត្រឡប់មកភោជនីយដ្ឋានវិញនៅម៉ោង ៦ ព្រឹក និង បានបាញ់គំរាមឡើងលើមេឃអស់ជាច្រើនគ្រាប់ ។ ខ្ញុំព្យាយាមសម្របសម្រួល ហើយពួកគេក៏យល់ព្រមចាកចេញទៅវិញ ។ បីនាក់ក្នុងចំណោមពួកវាបានវិលត្រឡប់មកម្តងទៀតនៅម៉ោងប្រហែល ៨ ព្រឹក ហើយពួកវាបានបាញ់រះគ្រប់ទិស ដូចក្នុងរឿងកាប់ចាក់អ៊ីចឹង ។ ខ្ញុំ និង មនុស្សផ្សេងទៀតនៅទីនោះបាននាំគ្នារត់ប្រាស់អាយុ" ។
ក្រុមអាជ្ញាធរមូលដ្ឋានបាននិយាយថា គ្មាននរណាម្នាក់រងរបួសនោះទេ ទោះបីជាមានការបាញ់បោះចំនួន ៥០ គ្រាប់នៅកន្លែងកើតហេតុក៏ដោយ ។ ប៉ូលិសបាងកកនិយាយថា ពួកគេបានកំណត់អត្តសញ្ញាណពួកបាញ់ប្រហារអស់ហើយៗនឹងសុំដីកាចាប់ខ្លួនពួកគេ ៕
