ភ្នំពេញ ៖ មិនមានទៀតទេសម្រាប់សេវាកម្ម “តេអស់ស្ទះ” និង “តេបះសក់” ដែលសុទ្ធតែជាសេវាកាត់ថ្លៃទាប ឬខលឥតគិតថ្លៃ ត្រូវបានក្រុមហ៊ុន Smart ប្រកាសបិទទាំងស្រុងចាប់ពីថ្ងៃទី២៩ មេសា នេះតទៅ។
សេចក្ដីប្រកាសខាងលើនេះធ្វើឡើងបន្ទាប់ពីក្រុមហ៊ុនផ្គត់ផ្គង់បណ្ដាញទូរសព្ទទាំងអស់ (Mobile Operator) ទទួលបានប្រកាសពីអន្តរក្រសួងលេខ ២៣២ រវាងក្រសួងប្រៃសណីយ៍ទូរគមនាគមន៍ និង ក្រសួងសេដ្ឋកិច្ច និង ហិរញ្ញវត្ថុ ដោយប្រាប់ដល់ក្រុមហ៊ុនទូរសព្ទទាំងអស់ដែលកំពុងដំណើរការនៅកម្ពុជា មិនអនុញ្ញាតឲ្យផ្ដល់សេវាកម្មនិយាយឥតគិតថ្លៃ (Call Bonus) ឬខលហ្វ្រីទៀតទេ។
ក្នុងសេចក្ដីប្រកាសដដែលនោះ បានសង្កត់ធ្ងន់ថា នេះជាផលវិបាកមួយដែលតម្រូវឲ្យក្រុមហ៊ុនត្រូវតែធ្វើការផ្លាស់ប្ដូរអត្រាតម្លៃ និងផ្ដល់សេវាកម្មថ្មី ចាប់ពីថ្ងៃទី២៩ មេសា ២០១៣ នេះតទៅ។
ទន្ទឹមនឹងការបិទឈប់ឲ្យដំណើរការការយកតម្លៃ និងឃោសនាពាណិជ្ជកម្មទាបហួសកំណត់នេះដែរ ក្រុមហ៊ុន Smart បានចេញអត្រាគិតថ្លៃសម្រាប់ជាព័ត៌មានដល់អតិថិជនជ្រាប និងឆ្លើយតបទៅតាមការកំណត់របស់ក្រសួង គឺចុះថ្លៃ ១០% ឬគិតថ្លៃ ៤.៥សេន ក្នុងមួយនាទីលើកលែងតែឆ្លាត៦។
ប្រកាសបន្ទាប់ពីកាត់ផ្ដាច់ជីវិតសេវាខលឥតគិតថ្លៃរបស់ខ្លួន សង្កេតឃើញថា ការបន្ថែម ត្រូវបានបង្វិល និងពង្រីកទំហំMB សម្រាប់ការប្រើប្រាស់អ៊ីនធឺណិត និង ផ្ញើសារក្នុងប្រព័ន្ធសម្រាប់ការបញ្ចូលទឹកប្រាក់ម្ដងៗ។
ទន្ទឹមនេះដែរ លោក រីយ៉ា ប្រធានផ្នែក Call Center របស់Beeline ក៏បានលើកឡើងដែរថា បច្ចុប្បន្នកម្មវិធីដូរលុយ និងកម្មវិធីដែលផ្ដល់នាទីនិយាយដោយមិនគិតថ្លៃ សម្រាប់អតិថិជនទាំងអស់ គឺលែងមានទៀតហើយ។
លោកបានសង្កត់ធ្ងន់បន្ថែមថា មិនមែនមានតែ Beeline ទេ ដែលបញ្ឈប់កម្មវិធី Call Free ប៉ុន្តែក្រុមហ៊ុនផ្សេងៗទៀតដ៏ដូចគ្នាដែរ។
ក្រុមហ៊ុនផ្គត់ផ្គង់បណ្ដាញទូរសព្ទ (Mobile Operators) មានចំនួន ៦ ខណៈអ្នកប្រើប្រាស់ទូរសព្ទសរុប ជិត ២០លានគ្រឿង (ចល័ត និងអចល័ត)។
យល់យ៉ាងណាចំពោះការបាត់បង់វត្តមានខលហ្វ្រីនេះ?
ប្រភព៖ គេហទំព័រសារព័ត៌មាន សប្បាយ
