ភ្នំពេញ ៖ នាង រ៉េន សុធារី ហៅឃ្មឹប អតីតភរិយានាយ ហុងដា បាននិយាយប្រាប់ Sabay ទាំងអួលដើមកថា បច្ចុប្បន្នកុំតែបានការងារជាសន្តិសុខ ម្ល៉េះមិនដឹងថា ទៅពឹងពាក់អ្វីឡើយ ខណៈដែលការងារសិល្បៈមិនមាន អ្វីជាដុំកំភួននោះ។
ក្នុងជំនួបជាមួយ Sabay ក្នុងពេលថតកម្មវិធីឲ្យទូរទស្សន៍ជាតិកន្លងមក ឃ្មឹប បានឲ្យដឹងថា បច្ចុប្បន្នការងារសិល្បៈរបស់នាងមិនសូវជាកាក់កបឡើយ ពោលគឺបានចេញសម្ដែងតែក្នុងពិធីកាត់សក់តាមរោងការតែប៉ុណ្ណោះ តាមរយៈនាយឃ្លោក ដែលច្រើនចេញទៅសម្តែងតាមខេត្តនានា។
ទោះយ៉ាងនេះក្តី ឃ្មឹប បានបញ្ជាក់ថា ចំណូលដែលបានពីការចេញទៅកាត់សក់ជាមួយនាយឃ្លោកនោះ មិនអាចផ្គត់ផ្គង់គ្រួសារគ្រប់គ្រាន់នោះឡើយ ព្រោះក្រុមគ្រួសាររបស់នាងមានសមាជិកច្រើន ហើយម្យ៉ាងផ្ទះក៏ជួលគេទៀត។ ដូច្នេះនាង ថា បច្ចុប្បន្នកុំតែបានការងារជាសន្តិសុខ ដែលយាមប្រចាំការនៅរដ្ឋសភា កុំអីមិនដឹងទៅជាយ៉ាងណានោះឡើយ។
ឃ្មឹប បានឲ្យដឹងទៀតថា ការងារជាសន្តិសុខយាមនៅរដ្ឋសភា គឺធ្វើតាំងពីមិនទាន់ក្លាយជាប្ដីប្រពន្ធ ជាមួយនាយហុងដាមកម៉េ្លះ។ នាង ប្រាប់ថា ទោះបីការងារនេះ ទទួលបានប្រាក់ខែតិចមិនអាចរ៉ាប់រងការចំណាយក៏ពិតមែន ប៉ុន្តែមិនអាចបោះបង់ចោលនោះទេ ព្រោះនេះជាការងារក្របខណ្ឌរាជការមួយ និងជាឆ្នាំងបាយរបស់នាងបន្ទាប់ពីការងារសិល្បៈ។
តារាកំប្លែងរូបនេះ ប្រាប់បន្តថា បច្ចុប្បន្ននាងរវល់ខ្លាំងណាស់ក្នុងការរកប្រាក់ចិញ្ចឹមម្ដាយ ក្នុងនោះជារៀងរាល់ព្រឹក ត្រូវទៅយាមនៅរដ្ឋសភា ហើយប្រសិនបើមានកម្មវិធីត្រូវទៅសម្ដែងសិល្បៈជាមួយនាយឃ្លោកឬ អ្នកសិល្បៈផ្សេងទៀត គឺត្រូវសុំច្បាប់។ ចំណែកនៅពេលយប់វិញ នាងត្រូវទៅច្រៀងនៅភោជនីយដ្ឋាន “ស្ទឹងមាស” ជិតវត្តព្រែកលៀប ។
ឃ្មឹប បារម្ភថា ការងារសិល្បៈ ប្រហែលជាមិនអាចវិលទៅរកសភាពដើមវិញបានឡើយ ខណៈការសម្ដែងនៅលើកញ្ចក់ទូរទស្សន៍ស្ងាត់ដូចជាចោរលួចសេះនោះ។ តែទោះជាយ៉ាងនេះក្ដី នាង បញ្ជាក់ថា នឹងមិនបោះបង់ចោលដូចគ្នានឹងការងារសន្តិសុខ។ ដូច្នេះហើយ ទើបបច្ចុប្បន្ននាងកំពុងតែចាប់យកជំនាញច្រៀងភ្លេងការ ដោយការមើលឃើញថា អាជីពមួយនេះអាចរកប្រាក់បាន សម្រាប់ចិញ្ចឹមជីវិតទៅថ្ងៃមុខ។
នាង រ៉េន សុធារី ហៅ ឃ្មឹប បានលែងលះគ្នាជាមួយនាយហុងដា ជិត៣ឆ្នាំមកហើយ បន្ទាប់ពីរៀបការជាមួយគ្នាជិត១០ឆ្នាំ ។ ចំណងស្នេហ៍របស់នាង និងនាយហុងដា ទទួលបានកូន៣ នាក់។ បច្ចុប្បន្ននាយ ហុងដា បានរៀបការប្រពន្ធថ្មីរួចហើយ ថែមទាំងទទួលបានកូន ១នាក់ទៀត ចំណែកនាងឃ្មឹបវិញ នៅមិនទាន់មានស្វាមីថ្មីឡើយ។ នាងបាននិយាយថា អត់ទាន់គិតទេព្រោះខ្លាចជួបស្នេហ៍មិនសំប្រកបដូចមុនទៀត៕
ប្រភព៖ គេហទំព័រសារព័ត៌មាន សប្បាយ
