វាគឺជាអាការៈមួយដែលបានកើតឡើងលើក្មេងស្រីតូចឈ្មោះ លីវ ល័ងលី ដែលបានឆ្លងកាត់ភាពតក់ស្លត់ក្នុងរយៈពេលប្រាំមួយឆ្នាំរបស់នាងច្រើនជាងមនុស្សភាគច្រើនដែលធ្លាប់បានឆ្លងកាត់ក្នុងមួយឆាកជីវិតរបស់ពួកគេទៅទៀត
ក្មេងស្រីសិស្សសាលារូបនេះបានកើតមកជាមួយនឹងរោមពណ៌ខ្មៅដុះនៅលើមុខ និង លើរាងកាយរបស់នាងប្រមាណជាង ៦០ ភាគរយ ។ ប៉ុន្តែប្រសិនបើអាការៈប៉ុណ្ណឹងនៅតែមិនទាន់អាក្រក់គ្រប់គ្រាន់ទៀត នោះអាការៈកាន់តែអាក្រក់ជាងនេះប្រហែលជានឹងកើតឡើងជាបន្តបន្ទាប់ទៀតជាមិនខាន ។
ដោយសារតែអាការៈដ៏កម្ររបស់នាងដែលប៉ះពាល់លើមនុស្សម្នាក់ក្នុងចំណោមមនុស្សមួយពាន់លាននាក់ នាងក៏ត្រូវម្តាយឪពុកទាំងទ្វេរបស់នាងបោះបង់ចោល ។ នៅពេលមានអាយុទើបបានពីរខួប ម្តាយរបស់នាងចាកចេញពីផ្ទះរបស់គ្រួសារ ហើយមិនបានប៉ុន្មានផងឪពុករបស់នាងក៏បានយកនាងទៅទុកនៅមណ្ឌលថែទាំកុមារ និងមិនដែលវិលមករកនាងវិញនោះឡើយ ។
មណ្ឌលថែទាំកុមារបានធ្វើសេចក្តីប្រកាសព័ត៌មានមួយស្វែងរកមើលសាច់ញាតរបស់កុមារតូចរូបនេះដើម្បីឲ្យមកយកនាងទៅវិញ ហើយប្រាំមួយខែក្រោយមកជីតារបស់បងប្អូនជីដូនមួយម្នាក់របស់នាងក៏បានមករកនាង ។ ហើយជីតាឈ្មោះ លីវ មីងយីង បានមើលថែក្មេងស្រីលីវ ល័ងលីដែលមានស្រុកកំណើតមកពីទីក្រុងហ្គីយ៉ាងខេត្តហ្គីហ្ស៊ូស្ថិតនៅភាគនិរតីប្រទេសចិនចាប់តាំងពីពេលនោះមក ។
ទោះជាយ៉ាងណា លោកតារូបនេះមានការព្រួយបារម្ភថានាងនឹងតែងតែត្រូវលងបន្លាចដោយសាររូបរាងរបស់នាង ។ ក្មេងស្រីតូចរូបនេះមិនមានលទ្ធភាពរកបានមិត្តភក្តិនោះទេព្រោះកុមារដទៃទៀតមានការភ័យខ្លាចរូបនាង ឬ ចូលចិត្តលេងសើចបែបចំអកដាក់នាង ។
ថ្មីៗនេះមិនទាន់មានការពន្យល់ជាផ្លូវការចំពោះអាការៈរបស់កុមារីលីវ ល័ងលីនៅឡើយទេ ។ ទោះជាយ៉ាងណា វាមើលទៅស្រដៀងនឹងអាការៈជំងឺ Hypertrichosis Universalis ដែលបណ្តាលឲ្យអ្នករងជំងឺនេះមានរោមដុះពេញរាងកាយ និងប៉ះពាល់តែលើមនុស្សម្នាក់ប៉ុណ្ណោះក្នុងចំណោមមួយពាន់លាននាក់ ៕
ដកស្រង់ពី cen
