នៅសល់តែប៉ុន្មានថ្ងៃទៀតប៉ុណ្ណោះ តារាសម្តែង និងជាពិធីការិនី កញ្ញា ហេង ម៉ារ៉ាឌី នឹងថតបញ្ចប់ខ្សែរឿងភាគ “ព្យុះស្នេហ៍សេសាន្ត” ហើយ។ ក្រោយថតចប់ខ្សែរឿងនេះ កញ្ញា ហេង ម៉ារ៉ាឌី បានប្រកាសថា នឹងផ្អាកការសម្តែងមួយរយៈ ដើម្បីមានពេលវេលាគ្រប់គ្រាន់សម្រាប់មើលការខុសត្រូវក្នុងហាងសាឡនរបស់នាង។ ម៉ារ៉ាឌី និយាយថា “មួយរយៈទៀតនេះ ខ្ញុំនឹងផ្អាករាល់ការសម្តែងជាបណ្តោះអាសន្ន ហើយ ដោយសារតែមិនអាចបោះបង់ការងារក្នុងហាងសាឡនរបស់ខ្ញុំបាននោះទេ ព្រោះថាពេលនេះ ហាងរបស់ខ្ញុំកំពុងតែទទួលបានការគាំទ្រ និងមានអតិថិជនច្រើនគួរសម។
បើទោះបីជាហាងសាឡនរបស់នាងទើបតែបើកដំណើរការបានជាងមួយឆ្នាំក៏ដោយ ប៉ុន្តែ មួយរយៈនេះហាក់មានភ្ញៀវចេញចូលមិនដាច់ ពិសេសមិត្តភ័ក្តិសជាអ្នកសិល្បៈ ដែលបាននឹងកំពុងតែសស្រាក់សស្រាំមកកាន់ហាង សាឡនម៉ារ៉ាឌី របស់នាង។ កញ្ញា ហេង ម៉ារ៉ាឌី បានបន្តឲ្យដឹងថា នៅប្រហែលមួយសប្តាហ៍ទៀត នាងនឹងថតបញ្ចប់ខ្សែរឿងភាគ “ព្យុះស្នេហ៍សេសាន្ត” ហើយ ដែលក្នុងគម្រោង រឿង “ព្យុះស្នេហ៍សេសាន្ត” នឹងត្រូវដាក់បញ្ចាំងឲ្យទស្សនានៅលើកញ្ចក់ទូរទស្សន៍ ហង្សមាស HDTV ប៉ុន្តែ នៅមិនទាន់ដឹងថា បញ្ចាំងក្នុងពេលវេលាណាមួយនោះនៅឡើយទេ។
បើទោះបីជាឆ្នាំនេះ ហេង ម៉ារ៉ាឌី មានវ័យ២៩ឆ្នាំហើយក៏ដោយ ប៉ុន្តែ មើលទៅ នាងនៅតែមានសម្រស់ស្រស់ស្អាតដដែល។ មិនឲ្យស្រស់ស្អាតយ៉ាងម៉េច បើនាងជាម្ចាស់ហាងសាឡនមួយទៅហើយ ដូច្នេះ ប្រហែលជាមិនអាចធ្វេសប្រហែសបានឡើយបញ្ហាសម្រស់នេះ រីឯអាយុកាលដែលចេះតែវិវឌ្ឍទៅមុខនោះ វាគ្រាន់តែជាតួលេខប៉ុណ្ណោះ។ ទាក់ទិននឹងរឿងបេះដូងវិញ ម៉ារ៉ាឌី បានបង្ហើបប្រាប់ថា នៅមិនទាន់គិតគូទេ ប្រហែលជាមួយឆ្នាំទៀត ប៉ុន្តែ បើគូព្រេងមកដល់ នោះមិនអាចគេចបានទេ៕
ដកស្រង់ពីថ្មីៗ
