ប៉ូលីសបានចូលទៅចាប់ស្ត្រីអាក្រាតកាយម្នាក់ បន្ទាប់ពីនាងបានដោះខោអាវចេញ ហើយដេកនៅពីមុខឡានពេទ្យ ដើម្បីបញ្ឈប់ឡានដែលកំពុងដឹកស្រីស្នេហ៍ របស់ប្តីនាងនោះទៅកាន់មន្ទីរពេទ្យ។
អ្នកស្រី ហ្សាង ស៊ី អាយុ៣៨ឆ្នាំ មកពីទីក្រុងលីនយី ខេត្តសានដុង ប្រទេសចិនភាគខាងកើត តាមការបញ្ជាក់ដោយមិនបង្ហាញភស្តុតាង បានបើកឡានបំបុកស្ត្រីអ្នកជិតខាងឈ្មោះ វ៉ាង លូ និងកូនស្រីអាយុបួនឆ្នាំរបស់ស្ត្រីនោះដោយកំហឹងយ៉ាងខ្លាំង ដោយសារចោទប្រកាន់ថាលួច ទាក់ទងស្រឡាញ់ប្តីរបស់ខ្លួន។
ប៉ុន្តែនៅពេលដែលផ្នែក សេវាកម្ម សង្គ្រោះបន្ទាន់បានមកដល់ គាត់បានធ្វើអ្វីៗគ្រប់យ៉ាងដែលគាត់អាចធ្វើទៅបាន ដើម្បីរារាំងការបញ្ជូនជនរងគ្រោះ ទៅព្យាបាលសង្គ្រោះជីវិតឲ្យបានភ្លាមៗ សូម្បីនៅពេលដែលក្រុមមន្ត្រីប៉ូលីសបានភ្ជង់កាំភ្លើងដាក់រាងកាយអាក្រាតរបស់គាត់ក៏ដោយ។
អ្នកនាំពាក្យប៉ូលីសម្នាក់បាននិយាយថា "គាត់បានរារាំងមនុស្សគ្រប់គ្នាដែលបានព្យាយាមជួយយកសង្គ្រោះជនរងគ្រោះទាំងពីរ។បន្ទាប់មកនៅពេលដែលឡានពេទ្យបានមកដល់ គាត់បានដោះសំលៀកបំពាក់របស់ចេញអស់ ហើយដេកនៅពីមុខឡានពេទ្យដើម្បីរារាំងវាមិនឲ្យដឹកជនរងគ្រោះទៅកាន់មន្ទីរពេទ្យ"។
អ្នកស្រី ហ្សាង ដែលមានកំហឹងដុតរោលរាលត្រូវបានចោទប្រកាន់ពីបទបើកឡានបំបុកអ្នកស្រី វ៉ាង និងកូនស្រី បន្ទាប់ពីមានជម្លោះមួយដែលលោកស្រីបានប្រឈមមុខដាក់ប្តីអំពីរឿងសហាយស្មន់របស់គាត់។
ប៉ូលីសអះអាងថា ស្ត្រីកូនពីររូបនេះបន្ទាប់មកបានឈរយាមជនរងគ្រោះដែលមានរបួសយ៉ាងធ្ងន់ធ្ងរទាំងពីរនាក់ ដើម្បីរារាំងមិនឲ្យនរណាម្នាក់ផ្តល់ការសង្គ្រោះបឋមដល់ពួកគេឡើយ។
ក្រុមរដ្ឋអាជ្ញានិយាយថា ពេលនេះអ្នកស្រី ហ្សាង ដែលជាគ្រូបង្រៀនសាលាបឋមសិក្សាម្នាក់ កំពុងប្រឈមមុខនឹងការកាត់ទោសពីបទឃាតកម្មនិងបានព្យាយាមសម្លាប់មនុស្សដោយចេតនា។
ប្រសិនបើត្រូវបានរកឃើញពិរុទ្ធភាពគាត់ប្រឈមមុខនឹងការផ្តន្ទាទោសប្រហារជីវិត។
រដ្ឋអាជ្ញាមួយរូបបាននិយាយថា "នេះមិនមែនជាបទល្មើសដែលកើតចេញពីការប្រចណ្ឌរឿងស្នេហានោះទេ។ គាត់បានរារាំងជនរងគ្រោះពីរនាក់ពីការទទួលការព្យាបាលអស់រយៈពេលជិតកន្លះម៉ោង"៕
- ប្រភព CEN
