ម៉ាក សែនសូនីតា ធ្លាប់បានទទួល ជោគជ័យយ៉ាងខ្លាំងក្លា ម្តងរួចមកហើយ អំឡុងពេលដែល តារាសម្តែងស្រស់សោភារូបនេះ ទៅសម្តែងនៅប្រទេស នៅអូស្ត្រាលីកាលពីខែកក្កដា កន្លងទៅ ធ្វើឲ្យនាងមានការសប្បាយចិត្តរីក មុខរីកមាត់យ៉ាងខ្លាំងទៀតផង ។
ប៉ុន្តែដោយឡែកថ្មីៗនេះ ម៉ាក សែនសូនីតា ពុំសូវសប្បាយក្នុងចិត្តប៉ុន្មាននោះទេ ព្រោះដោយសារតែ តារាសម្តែងរាងតូចច្រឡឹង រូបនេះ ត្រូវអាក់ខានដំណើរ ទៅចូលរួមការសម្តែង Show ជាមួយសមាជិកក្រុម របស់នាងនៅឯប្រទេសវៀតណាម ដែលជាកម្មវិធីថ្នាក់ ជាតិដ៏ ធំមួយជួយលើកស្ទួយ វប្បធម៌ប្រទេសកម្ពុជា នៅលើឆាកអន្តរជាតិ។
បើតាមប្រភពពីអ្នកសិល្បៈដូចគ្នា បានឲ្យដឹងថា មូលហេតុដែល ម៉ាក់ សែនសូនីតា មិនបានទៅចូលរួមអបអរ និងសម្ដែងក្នុងវេទិកា Cambodia Night នៅក្នុងទីក្រុងហូជីមិញ ព្រោះដោយសារតែ ម៉ាក់ សែនសូនីតា ជាប់រវល់ថតខ្សែភាពយន្ត ឲ្យផលិតកម្មក្នុងស្រុក និងជាប់កុងត្រាធ្វើ ជាពិធីការិនីរបស់ស្ថានីទូរទស្សន៍ប៉ុស្តិ៍លេខប្រាំផងដែរ ។
ថ្វីបើនាងខកខានឱកាស មិនបានចេញបង្ហាញ សមត្ថភាពក្នុងកម្មវិធី ថ្នាក់ជាតិឯទឹកដីវៀតណាម យ៉ាងណាក្ដី ក៏ ម៉ាក សែនសូនីតា ពុំបានបង្ហាញអារម្មណ៍ សោកស្ដាយរហូតដេក មិនលក់បក់មិនល្ហើយនោះដែរ ព្រោះនាងនៅ មានឱកាសចេញទៅ សម្ដែងនៅក្រៅ ប្រទេស ជាច្រើនទៀត ហើយអាចកើបចំណូល បានច្រើនជាងនេះទ្វេរដងទៀតផង៕
