ម្ចាស់របស់ Zeus ដែលជាឆ្កែខ្ពស់ជាងគេបង្អស់របស់ពិភពលោកនិយាយថាឆ្កែមាឌដំបង របស់អ្នកស្រីធំ ខ្លាំងណាស់ ដែលធ្វើឲ្យក្មេងៗគិតថាជាកូនសេះ។
ពូជឆ្កែ Great Dane កម្ពស់១,១១ម៉ែត្រមួយក្បាលត្រូវបានដាក់ឈ្មោះជាឆ្កែខ្ពស់ជាងគេបង្អស់របស់ពិភពលោក ដោយអង្គការឯកទគ្គកម្មពិភពលោក។
ដោយត្រូវបានដាក់ឈ្មោះយ៉ាងសក្តិសមថា Zeus ឆ្កែនេះមានទម្ងន់៧០,៣៧គីឡូក្រាម និងកម្ពស់គួរឲ្យភ្ញាក់ផ្អើល២,២៣ម៉ែត្រនៅពេលឈរនៅលើជើងក្រោយរបស់វា។
ម្ចាស់ឈ្មោះ Denise Doorlag មកពីរដ្ឋមីឈីហ្កាន សហរដ្ឋអាមេរិក និយាយថា ឆ្កែអាយុបីឆ្នាំនេះធំខ្លាំងណាស់ដែលធ្វើឲ្យពួកក្មេងតូចៗគិតថាវាជាសេះមួយក្បាល។
អ្នកស្រីបាននិយាយថា គ្រួសាររបស់អ្នកស្រីត្រូវបានផ្តល់កិត្តិយសដោយការដាក់សត្វចិញ្ចឹមរបស់ពួកគេនេះ ចូលក្នុងសៀវភៅកំណត់ត្រាឯតទគ្គកម្មពិភពលោក។"យើងគ្រាន់តែជាគ្រួសារធម្មតាមួយមកពីរដ្ឋមីឈីហ្កាន ដូច្នេះការដែលអាចនិយាយថាយើងជាម្ចាស់ឆ្កែខ្ពស់ជាងគេបង្អស់របស់ពិភពលោក គឺពិតជាគួរឲ្យចាប់អារម្មណ៍ខ្លាំងណាស់ ហើយកូនក្មេងតូចៗពិតជាមានអារម្មណ៍រំភើបជាខ្លាំង"។
អ្នកស្រី Doorlag បានបន្ថែមថា ប្រតិកម្មរួមបំផុតចំពោះ Zeus ដែលស៊ីអាហារអស់១៣,៦២គីឡូក្រាមជារៀងរាល់ថ្ងៃ គឺថាជាភាពភ្ញាក់ផ្អើល។
"ជារឿយៗយើងទទួលសំណួរថា ៖ តើអ្នកមានអានសម្រាប់សេះទេ? ឬ តើនោះជាឆ្កែឬជាកូនសេះ? ប៉ុន្តែមនុស្សមួយចំនួនបានត្រឹមងឿងឆ្ងល់ប៉ុណ្ណោះ។ វាពិតជាគួរឲ្យចង់សើចណាស់"។
គាត់បានបន្ថែមថា ៖ "វាគួរឲ្យអស់សំណើចណាស់ដែលឃើញប្រតិកម្មរបស់មនុស្ស ជាពិសេសកូនក្មេងតូចៗ ពួកគេគិតថាវាពិតជាសេះមួយក្បាល !"។
យោងតាមកំណត់ត្រាថ្មី Zeus បំបែកឯកទគ្គកម្មលើកមុនដែលត្រូវបានកាន់កាប់ដោយពូជឆ្កែ Great Dane មួយផ្សេងទៀតដែលមានឈ្មោះថា Giant George ដោយខ្ពស់ជាង២,៥០សង់ទីម៉ែត្រ៕
