អ្នកនាំពាក្យអគ្គស្នងការដ្ឋាននគរបាលជាតិ លោក គៀត ច័ន្ទថារិទ្ធ ថ្លែងនៅក្នុងសន្និសីទសារព័ត៌មាននៅថ្ងៃទី២៦ ខែមិថុនា ឆ្នាំ២០១៣ ថា ប៉ូលិសជិត ២ម៉ឺននាក់ ត្រៀមការពារសន្តិសុខរយៈពេលឃោសនាបោះឆ្នោត។ ហើយនៅថ្ងៃបោះឆ្នោត និងរាប់សន្លឹកឆ្នោត នឹងមានកម្លាំងការពារសន្តិសុខរហូតទៅដល់ជិត ៧ម៉ឺននាក់។
ចាប់ពីថ្ងៃទី២៧ ខែមិថុនា តទៅ សមត្ថកិច្ចមានគោលដៅការពារនៅគ្រប់ការិយាល័យបោះឆ្នោត និងការពារមុខសញ្ញាជនដែលត្រូវការពារ៖ «ក្នុងដំណាក់កាល យុទ្ធនាការឃោសនាបោះឆ្នោតនេះ កម្លាំងជាទូទៅ គឺយើងប្រើជិត ២ម៉ឺននាក់ ក្នុងដំណាក់កាល១ខែ។ ហើយ ២ម៉ឺននាក់នេះ គឺជាកម្លាំងដែលមានឈ្មោះក្នុងបញ្ជីដែលយើងរាប់ថា កម្លាំងជាក់ស្តែងប្រតិបត្តិការចំហ យើងអត់និយាយដល់កម្លាំងសម្ងាត់ និងកម្លាំងគាំទ្រផ្សេងទៀតទេ។ ក្រៅពីនោះ ដល់ពេល ដំណាក់កាលមុន ៤-៥ថ្ងៃសម្រាប់ការបោះឆ្នោតហ្នឹង និងដល់ថ្ងៃបោះឆ្នោតហ្នឹង ជាក់ស្តែងតែម្តង គឺយើងប្រើកម្លាំងសរុបរហូតដល់ជិត ៧ម៉ឺននាក់»។
លោក គៀត ច័ន្ទថារិទ្ធ បន្ថែមថា កម្លាំងសមត្ថកិច្ចត្រៀមការពារច្រើន គឺព្រោះតាមច្បាប់បោះឆ្នោត ការិយាល័យបោះឆ្នោតនីមួយៗត្រូវមានភ្នាក់ងារសន្តិសុខចំនួន ៣នាក់។ ប៉ុន្តែ ការបោះឆ្នោតជ្រើសតាំងសមាជិកសភានីតិកាលទី៥ មានការិយាល័យបោះឆ្នោតជាង ១ម៉ឺន ៩ពាន់ ការិយាល័យ ទើបត្រូវបង្កើនកម្លាំងការពារសន្តិសុខច្រើនដែរ៖ «អីចឹង ១ម៉ឺន ៩ពាន់ ៩ការិយាល័យ អស់លោកគុណនឹង៣ទៅ ឃើញហើយ ជាង ៥ម៉ឺននាក់ហើយ។ អីចឹងយើងនៅកម្លាំងការពារ ក្រៅពីនោះយើងមានកម្លាំងការពារនៅតាមទីស្នាក់ការរបស់គណៈកម្មការ ជាតិរៀបចំការបោះឆ្នោត ថ្នាក់ឃុំសង្កាត់នោះ ហើយយើងមានកម្លាំងដែលត្រៀមបម្រុងសម្រាប់អន្តរាគមន៍នៅគ្រប់ខណ្ឌ ស្រុក ក្រុង។ យើងមានកម្លាំងអន្តរាគមន៍នៅថ្នាក់រាជធានី ខេត្ត និងនៅថ្នាក់កណ្ដាលទៀត។ អីចឹង សរុបមកកម្ពស់ចុងក្រោយនោះ ជិត ៧ម៉ឺន ខ្វះតិចតួច»។
លោកថា តាមច្បាប់បោះឆ្នោត នៅការិយាល័យបោះឆ្នោតនីមួយៗ សមត្ថកិច្ច ៣នាក់អាចមានអាវុធតែ១ដើមសម្រាប់ការពារថ្ងៃបោះឆ្នោត។ ប៉ុន្តែប៉ូលិសម្នាក់ដែលឈរនៅចម្ងាយ ១៥ម៉ែត្រ ពីការិយាល័យបោះឆ្នោតផ្នែកខាងក្រៅការិយាល័យបោះឆ្នោត ប៉ូលិសនោះមិនអនុញ្ញាតឲ្យកាន់អាវុធទេ។ តែប៉ូលិសដែលឈរនៅខាងក្រៅចម្ងាយ ១០០ម៉ែត្រ ទៅ ១៥០ម៉ែត្រ ពីការិយាល័យបោះឆ្នោត គឺជាប៉ូលិសដើរល្បាតការពារកន្លែងបោះឆ្នោតចំនួន ២នាក់ អនុញ្ញាតឲ្យកាន់អាវុធ ១ដើម ដែលមានគ្រាប់កាំភ្លើងយ៉ាងច្រើនបំផុត ៣០គ្រាប់។
លោកបានឲ្យដឹងថា អំពើហិង្សាមុនពេលឃោសនាបោះឆ្នោតមាន ១ករណី គឺការសម្លាប់ព្រះសង្ឃនៅខេត្តស្វាយរៀង ដែលមានការចោទថា ជារឿងនយោបាយ។ ប៉ុន្តែ ប៉ូលិសបានរកឃើញ គឺជាករណីប្លន់។ ក្រៅពីនោះ មានការទម្លាក់ និងកាប់ស្លាកគណបក្សនយោបាយ ដូចជាគណបក្សសង្គ្រោះជាតិ ជាដើម ដែលប៉ូលិសកំពុងស្វែងរកចាប់ខ្លួនជនប្រព្រឹត្តបទល្មើស យកទៅផ្ដន្ទាទោសតាមច្បាប់ជាធរមាន។ លោក គៀត ច័ន្ទថារិទ្ធ បន្ថែមថា កម្លាំងការពារសន្តិសុខនៅថ្ងៃឃោសនាបោះឆ្នោត រដ្ឋាភិបាលបានឧបត្ថម្ភថវិកាមួយថ្ងៃ ៨ពាន់រៀលក្នុងម្នាក់ សម្រាប់ ៣០ថ្ងៃ។ តែនៅក្នុងថ្ងៃបោះឆ្នោត និងរាប់សន្លឹកឆ្នោត ២ថ្ងៃ កម្លាំងការពារសន្តិសុខមានជិត ៧ម៉ឺននាក់ ក្នុងម្នាក់ ៨ពាន់រៀលដែរ ក្នុង ១ថ្ងៃដូចគ្នា។
ប្រធានគណៈបញ្ជាការសន្តិសុខអចិន្ត្រៃយ៍ និងជារដ្ឋមន្ត្រីក្រសួងមហាផ្ទៃ លោក ស ខេង ចេញសេចក្តីណែនាំឲ្យគណៈបញ្ជាការសន្តិសុខអចិន្ត្រៃយ៍ថ្នាក់រាជធានី ខេត្ត ត្រូវធានារាយការណ៍ ១ថ្ងៃពីរដង ព្រឹកម៉ោង៨ និងរសៀលម៉ោង៤ ចាប់ពីពេលនេះតទៅ រហូតដល់បោះឆ្នោតចប់សព្វគ្រប់ជាស្ថាពរ លើកលែងករណីបន្ទាន់ជះឥទ្ធិពលដល់ផ្នែកនយោបាយ ត្រូវរាយការណ៍ជាវិសាមញ្ញជូនមកខាងលេខាធិការដ្ឋាននៃគណៈបញ្ជាការ សន្តិសុខអចិន្ត្រៃយ៍ ដើម្បីមានវិធានការដោះស្រាយទាន់ពេល។
អាជ្ញាធរមានសមត្ថកិច្ច ត្រូវសហការឲ្យបានល្អជាមួយគណៈកម្មការរៀបចំការបោះឆ្នោតគ្រប់លំដាប់ ថ្នាក់ ដើម្បីធានាសន្តិសុខសណ្ដាប់ធ្នាប់នៅថ្ងៃទី២៧ ខែកក្កដា ឆ្នាំ២០១៣ ដែលជាថ្ងៃស្ងប់ស្ងៀមឲ្យបានត្រឹមត្រូវតាមច្បាប់បោះឆ្នោត និងបទបញ្ជារបស់ គ.ជ.ប។ ភ្នាក់ងារសន្តិសុខបោះឆ្នោត សហការជាមួយប្រធានការិយាល័យបោះឆ្នោត និងរាប់សន្លឹកឆ្នោត ធានាឲ្យបានសន្តិសុខការិយាល័យបោះឆ្នោត និងរាប់សន្លឹកឆ្នោត និងត្រូវអនុវត្តឲ្យបានត្រឹមត្រូវតាមនីតិវិធី និងបទបញ្ជាដែលបានកំណត់។
គណៈបញ្ជាការសន្តិសុខអចិន្ត្រៃយ៍តាមលំដាប់ថ្នាក់ ត្រូវរៀបចំឲ្យមានក្រុមប្រចាំការអចិន្ត្រៃយ៍នៅតាមថ្នាក់របស់ ខ្លួន ដើម្បីទទួលព័ត៌មាន និងដោះស្រាយព័ត៌មាន ពាក់ព័ន្ធដល់ការបោះឆ្នោតក្នុងដែនសមត្ថកិច្ចរបស់ខ្លួន។ ទន្ទឹមនោះ ត្រូវរៀបចំឲ្យមានក្រុមប្រតិកម្មរហ័ស ដើម្បីឆ្លើយតបចំពោះបាតុភាព ឬឧបទ្ទវហេតុផ្សេងៗ ចៀសវាងការឆ្លៀតកេងចំណេញខាងផ្នែកនយោបាយ ឬក្នុងគោលបំណងបំផ្លាញការបោះឆ្នោតជាដើម៕
ប្រភពពី RFA
