ទីភ្នាក់ងារព័ត៌មានដឹសាន់របស់អង់គ្លេសផ្សាយឱ្យដឹងថា ស្ត្រីជនជាតិឆែកម្នាក់ជក់កញ្ឆាដ៏ងុបងុលអស់រយៈពេលជាង៤ម៉ោង កើតអាការចម្លែកឃើញបង្គោលភ្លើងនឹកស្មានថាជាស្ពាន ក៏បានឡើងទៅលើបង្គោលភ្លើងជាង៤០ហ្វុត ឬ១២ម៉ែត្រ ធ្វើឱ្យសមត្ថកិច្ចដំណើរការលួងលោម និងនាំចុះមកវិញដោយសុវត្ថិភាព ។
បណ្តាអ្នកស្រុកនាំគ្នាភ្ញាក់ផ្អើល ក្រោយពីប្រទះឃើញស្ត្រីអាយុ២១ឆ្នាំម្នាក់មកពីក្រុងសាលីន ប្រទេសឆែកឡើងទៅលើបង្គោលភ្លើងថាមពលខ្ពស់ បង្ហាញឥរិយាបថរត់ដូចជាព្យាយាមឆ្លងទន្លេ ទើបទូរស័ព្ទប្រាប់សមត្ថកិច្ចសង្គ្រោះបន្ទាន់ ។អ្នកនាំពាក្យប៉ូលិសម្នាក់បង្ហើបឱ្យដឹងថា «វាជាសុបិន្តអាក្រក់ ព្រោះនាងញៀននឹងថ្នាំដ៏ធ្ងន់ធ្ងរ និងគ្មានសតិសម្បញ្ញៈល្អ នាងប្រហែលនឹកឃើញថា បង្គោលភ្លើងគឺជាស្ពានឆ្លងទន្លេណូរ៉ាវ៉ា» ។
ជាចុងក្រោយអ្នកជំនាញផ្តល់ការពិភាក្សាផ្នែកគ្រឿងញៀន និងសមត្ថកិច្ចអាចនិយាយស្តីលួងលោមនាងចុះមកដោយសុវត្ថិភាព ក្រោយពីចំណាយពេលធ្វើការលួងលោមអស់រយៈពេលជាង២ម៉ោង ។ អ្នកនាំពាក្យប៉ូលីសបង្ហើបឱ្យដឹងដូច្នេះថា «នាងត្រូវទទួលការព្យាបាលនៅមន្ទីរពេទ្យមួយកន្លែងក្នុងអាការញៀនថ្នាំ ប៉ុន្តែលើផ្នែកផ្សេង នាងមិនបានរងរបួសទេ ។ សំណាងល្អដែលនាងមិនបានឡើងឱ្យខ្ពស់ជាងនេះ ព្រោះខាងលើមានចរន្តតង់ស្យុងខ្ពស់» ៕
- ប្រភព កោះសន្តិភាព
