ភ្នំពេញ: ខៀវ លីលី គឺជាអ្នកចម្រៀង និងជាពិធីការិនី ដែលកំពុងកសាងកេរ្ដិ៍ឈ្មោះនៅក្នុងស្ថានីយទូរទស្សន៍ CTN ក្នុងកម្មវិធី "ដំណឹងហួសចិត្ត"។ ឆ្នាំនេះ លីលី មានអាយុ ១៩ ឆ្នាំប៉ុណ្ណោះ។
កញ្ញា ខៀវ លីលី មានស្រុកកំណើតនៅក្នុងទីក្រុងភ្នំពេញ ក្នុងសង្កាត់បឹងព្រលឹត ខណ្ឌ៧មករា រាជធានីភ្នំពេញ។ ឪពុកឈ្មោះ ខៀវ ហុង ជាមន្ត្រីរាជការ ម្ដាយជាមេផ្ទះ។ លីលី ជាកូនច្បងក្នុងគ្រួសារមួយដែលមានបងប្អូន ៣ នាក់។ ក្នុងនោះ ប្រុស ២ ស្រី ១ គឺរូបនាង។
សព្វថ្ងៃលីលី កំពុងតែសិក្សានៅសាកលវិទ្យាល័យ ធី ធី អាយ យូ ឆ្នាំទី១ ផ្នែកទីផ្សារ។ ដោយសារតែនាងមានរូបសម្ផស្ស ស្រស់ស្អាត មានទឹកដមសំឡេងពីរោះស្រទន់ និងមាននិស្ស័យស្រឡាញ់ចូលចិត្តសិល្បៈ នៅឆ្នាំ២០១០ លីលី បានជ្រៀតចូលក្នុងវិស័យសិល្បៈចម្រៀង ដោយច្រៀងថតសំឡេងឱ្យផលិតកម្ម ក្លាស៊ីក។
លីលី ត្រូវបានប្រិយមិត្តទស្សនិកជនស្គាល់នាង តាមរយៈបទ "កុំមកចង់លេសសេបង" បទ "ដូររ៉េមីរេសហ្វូល" បទ "ខូចចិត្ត" និងមានបទប្រហែលជា ២០ បទទៀត។
កញ្ញា ខៀវ លីលី បានឱ្យដឹងថា កន្លងមក ក្រៅពីច្រៀងថតសំឡេងចូលស៊ីឌី និងសម្ដែង ថតកាយវិការខារ៉ាអូខេ ឱ្យផលិតកម្មក្លាស៊ីក នាងក៏ធ្លាប់បានចូលរួមសម្ដែងថតខ្សែភាពយន្តខ្លះដែរ ដូចជា រឿង "កូនភ្លោះខ្ទើយចម្លែក" រឿង "ទាយាទអារីយ៉ា" និងរឿង "ចៅសម្គមបាញ់លលក" ដែលរឿងទាំងអស់នេះបានដាក់បញ្ចាំងនៅតាមរោងភាពយន្ដនៅទីក្រុងភ្នំពេញ និងនៅលើកញ្ចក់ទូរទស្សន៍ CTN ហើយកញ្ញា ក៏បានក្លាយជាតួឯកនៅក្នុងរឿង "ចៅសម្គមបាញ់លលក" ផងដែរ។
ក្រៅពីនេះ កញ្ញា លីលី តែងតែមានកិត្តិយស បានឡើងច្រៀងនៅលើឆាកប្រគំតន្ត្រីចុងសប្ដាហ៍នៅតាមស្ថានីយ ទូរទស្សន៍នានា គ្រប់ប៉ុស្ដិ៍ និងគ្រប់កម្មវិធីផងដែរ។
ក្នុង ឆ្នាំ២០១២ នេះ គេសង្កេតឃើញតារាចម្រៀងថ្មី សម័យយុវវ័យរូបនេះ បានឡើងកូដ ដោយបានក្លាយជាពិធីការិនីជាមួយតារាកំប្លែងលោក ពែកមី និងនាយក្រូច រាល់ថ្ងៃចន្ទ ជារៀងរាល់សប្ដាហ៍ នៅវេលាម៉ោង ៩ យប់ ដល់ម៉ោង ៩ និង ៤៥ នាទី។
កញ្ញា ខៀវ លីលី ក្រៅពីអាជីពជាតារាចម្រៀង តារាសម្ដែង និងជាពិធីការិនីថ្មីផងនោះ នៅពេលអនាគត នាងចង់បើកហាងសាឡន និងលក់សម្លៀកបំពាក់ទាន់សម័យ។ ចំណែករឿងស្នេហា កញ្ញា លីលី បានប្រាប់ថា នៅពេលនេះនាងសុំបិទបេះដូងសិន ចាំពេលរៀនចប់ ទើបគិតដល់ ព្រោះនាងនៅក្មេងណាស់ មិនចង់មានស្នេហានៅពេលដែលកំពុងសិក្សានោះទេ។ ប៉ុន្តែកន្លងមក ចាប់តាំងពីបណ្ដែតខ្លួនចូលវិស័យសិល្បៈ លីលី អះអាងថា មានប្រុសៗ គ្រប់វ័យតាមលួងលោមសុំសេចក្ដីស្នេហាពីនាង តែត្រូវបាននាងបដិសេធ មិនព្រមទទួលនោះទេ ហើយនាងក៏មិនចង់រញ៉េរញ៉ៃដែរ។
កញ្ញា លីលី បានអះអាងថា ចាប់តាំងពីនាងពេញវ័យមក នាងមិនធ្លាប់មានស្នេហានោះទេ ហើយបេះដូងរបស់នាងក៏មិនធ្លាប់បានជាប់ពាក់ព័ន្ធលើបុរសណាម្នាក់ ដែរ គឺនៅក្រពុំព្រហ្មចារីល្អបរិសុទ្ធ។
កញ្ញា លីលី មានកម្ពស់ ១,៦៦ ម៉ែត្រ ទម្ងន់ ៤៧ គីឡូក្រាម ដើមទ្រូងទំហំ ៣៤ ចង្កេះ ២៧ ត្រគាក ៣២។ នាងចូលចិត្តសម្លៀកបំពាក់សម័យចម្រុះ តែមិនសិចស៊ីពេកនោះទេ៕
ដកស្រង់ពីៈ cen
