ការស្លាប់របស់ប្រុសស្អាត បានបន្សល់ទុកនូវការសោកស្ដាយយ៉ាងធំធេង ពីក្រុមគ្រួសារ ដូច្នេះហើយទើបពួកគេបានព្យាយាមបិទព័ត៌មាននានា ពាក់ព័ន្ធនឹង សុខ វីរៈ ក្នុងនោះសូម្បីតែ Facebook របស់គេ ក៏ត្រូវលុបទិន្នន័យ និងអត្តសញ្ញាណមិត្តភ័ក្ដិអស់ដែរ។ ប៉ុន្តែថ្មីៗនេះ Sabay បានទទួលព័ត៌មានថ្មីខ្លះចាស់ខ្លះ ពីមិត្តភ័ក្ដិស្និទ្ធស្នាលរបស់គេ។ មិត្តភ័ក្ដិ ដែលស្នើសុំលាក់អត្តសញ្ញាណរូបនេះ បានប្រាប់ឲ្យដឹងថា សុខ វីរៈ និងនារីជាគូស្នេហ៍ បានស្រឡាញ់គ្នាជាង១ឆ្នាំមកហើយ ដោយបានសាងអនុស្សាវរីយ៍ជាច្រើនរាប់មិនអស់ ដែលចុងក្រោយអនុស្សាវរីយ៍ទាំងនោះហើយដែលបានរុំព័ទ្ធ វីរៈ យ៉ាងតឹងណែនរហូតធ្វើឲ្យរូបគេ រកផ្លូវដោះមិនបានក៏សម្លាប់ខ្លួនយ៉ាងនេះ។ មិត្តភ័ក្ដិរូបនេះបន្តថា តាមពិតទៅ កន្លងមក វីរៈ ក៏ធ្លាប់មានសង្សារផ្សេងដែរ ប៉ុន្តែហាក់មិនស្រឡាញ់ខ្លាំងដូចនារីចុងក្រោយនេះទេ។ ” តាមខ្ញុំមើលទៅ គឺ វីរៈ ស្រឡាញ់ខ្លាំងនាងខ្លាំងណាស់ គឺប្រហែលជាមានបំណងចង់ជាប់លាប់ជាមួយនាងរហូតក្លាយជាប្រពន្ធប្ដីមិនដឹង…បើមិនដូច្នេះ គេប្រហែលមិនឈឺចាប់យ៉ាងនេះទេ។”
ប្រភពលាក់មុខនេះ បន្តថា នៅមុន១ម៉ោង ដែល វីរៈ លោតទឹកសម្លាប់ខ្លួន គឺម៉ោង២ជាង វីរៈ និងសង្សារគេ បានណាត់គ្នា ទៅជួបនៅខាងក្រោយសាលា បាក់ទូក តែគេមិនដឹងថាពួកគេនិយាយរឿងអីឲ្យច្បាស់ទេពីដំបូង លុះក្រោយមកទើបដឹង មិត្តស្រីគេសុំបែក តែក៏មិនដឹងថាមូលហេតុអីដែរ។ បន្ទាប់ពីត្រូវមិត្តស្រីសុំបែកហើយ នោះ វីរៈ ក្នុងទឹកមុខស្រពាប់ស្រពោន បានត្រឡប់ទៅផ្ទះវិញ ហើយពេលទៅដល់ គេបានមុជទឹកធ្វើខ្លួនអីយ៉ាងស្អាតរួចហុចកាបូបលុយ និងទូរស័ព្ទឲ្យបងប្រុសជីដូនមួយគេ រួចនិយាយថា ” ចាប់ពីថ្ងៃហ្នឹងទៅ លែងបានជួបគ្នាហើយ ” ហើយរូបគេក៏ជិះម៉ូតូចេញពីផ្ទះយ៉ាងលឿន ហើយក្រុមគ្រួសារបងប្អូនក៏ជិះតាមពីក្រោយ តែតាមអត់ទាន់រហូតដល់ពេលគេលោតទឹកសម្លាប់ខ្លួនតែម្ដង ក៏ឃាត់មិនទាន់ដែរ។
នៅពេលសួរថា តើមុនពេលស្លាប់ តើ វីរៈ ធ្លាប់មានអាការៈខុសប្លែកអីដែរទេ? ប្រភពដដែលនេះ ឆ្លើយថា ” ទើបតែឥឡូវទេ ទើបនឹកឃើញថា គេប្រហែលមានបំណងចង់ស្លាប់យូរហើយ គ្រាន់តែមិនដឹងថាមកពីមូលហេតុអ្វី ព្រោះកន្លងមកគេ(សុខ វីរៈ)ធ្លាប់បង្ហោះតាម Facebook ថាបើថ្ងៃណាគេស្លាប់ទៅ អ្នកទាំងអស់គ្នាគិតម៉េច? តែគ្មាននរណាចាប់អារម្មណ៍ទេស្មានតែគេនិយាយលេង”។ មិត្តភ័ក្ដិរូបនេះ បន្តថា កុំថាឡើយក្រុមគ្រួសារ សូម្បីតែរូបគេ ក៏សោកស្ដាយដូចគ្នាគឺជាមនុស្សល្អ និងជាមិត្តភ័ក្ដិល្អ។
ប្រភពលាក់មុខ បន្ថែមថា ក្រោយស្លាប់ទៅ នៅប៉ុន្មានថ្ងៃមុននេះ វីរៈ បានមកពន្យល់សប្ដិម្ដាយគេថា ” ព្រលឹងគេអត់ទៅណាឆ្ងាយទេ គឺគេនៅចាំមិត្តភ័ក្ដិម្នាក់ទៀត “។ ការពន្យល់សប្ដិបែបនេះ មិនដឹងថាមិត្តភ័ក្ដិនោះជានរណា ឬក៏មិត្តស្រីគេទេ។ ប្រភពបានបន្ថែម។
ក្រោយពីស្លាប់ទៅ រូបថតយុវតីម្នាក់ ត្រូវបានសារព័ត៌មានជាច្រើនយកមកចុះផ្សាយ ថាជាសង្សារដែលសុំបែកពី សុខ វីរៈ តែក្រោយមក ក៏មានសារព័ត៌មានមួយបានបកស្រាយថា យុវតីក្នុងរូបនោះ មិនមែនជាសង្សារ វីរៈ ទេ។ ក៏ដូចគ្នាដែរ មិត្តភ័ក្ដិរូបនេះ ក៏បានបញ្ជាក់ដែរថា នារី នោះមិនមែនជាសង្សារ វីរៈ ដែលជាអ្នកធ្វើឲ្យ វីរៈ ស្លាប់ទេ គឺគេមានរូបសង្សារពិតប្រាកដ របស់ វីរៈ ប៉ុន្តែគេសុំមិនបញ្ចេញទាំងឈ្មោះ រួមទាំងអាសយដ្ឋាន និងឪពុកម្ដាយទាំងសង្ខាង។ គឺគេនិយាយ តែអ្វីដែលគេអាចនិយាយ និងបញ្ចេញបានតែប៉ុណ្ណោះ៕
ដកស្រង់ សប្បាយ
