ស្ថានីយ ទូរទស្សន៍ប៉ុស្តិ៍លេខ៩ បានសហការ ជាមួយសមាគមសិល្បៈខ្មែរ បង្កើតកម្មវិធីសិល្បៈមួយដែលមានឈ្មោះថា «ជីវិតសិល្បៈ» ហើយកម្មវិធីនេះ ត្រូវបានជ្រើសរើសតារាចម្រៀងនាង ម៉ាយ៉ាវីន ឲ្យចាប់ដៃគូគ្នាជាមួយលោក សុះ ម៉ាច។
ថ្វី បើអាជីពពិធីការិនីមានការបញ្ចេញសំនួនវោហារស័ព្ទបែបពណ៌នា ផ្ទុយពីការច្រៀងមើលតាមប៉ារ៉ូល តែទស្សនិកមួយចំនួនដែលនិយមតាមដានកម្មវិធី «ជីវិតសិល្បៈ» ក៏បានពោលសរសើរពីថ្វីមាត់តារារូបនេះផងដែរ។ ពួកគេបាននិយាយថា កន្លងមកថ្វីបើមិនដែលឃើញនាងធ្វើជាពិធីការិនី តែពេលនាងធ្វើការអធិប្បាយជាលក្ខណៈពិធីការ សំនួនវោហារសព្ទរបស់នាងក៏មិនចាញ់ពិធីការិនីដែលមានបទពិសោធក្នុង វិស័យសិល្បៈយូរឆ្នាំប៉ុន្មានដែរ។
ខណៈ ការយល់ដឹងលើអាជីពជាពិធីការិនីនៅមានកម្រិត តែ ម៉ាយ៉ាវីន ក៏មិនបានចាត់ទុកថា ការប្រើសំឡេងអធិប្បាយគ្មានការព្រាងទុកនេះនឹងផ្តល់ភាពភ្លេច ភ្លាំង ឬភាពលំបាកសម្រាប់នាងខ្លាំងក្លានោះដែរ ដោយនាងបានលើកហេតុផលថា នាងជាតារាចម្រៀង កាន់ក្បាលមីក្រូហ្វូនជាង១០ឆ្នាំមកហើយ។
តារា ចម្រៀងដែលធ្លាប់មានប្រវត្តិជាអ្នកលាងចានក្នុងភោជនីយដ្ឋាន នាង ជុំ ម៉ាយ៉ាវីន បាននិយាយថា៖ «ទោះបីខ្ញុំមិនធ្លាប់មានបទពិសោធធំដុំក្នុងការធ្វើជាពិធី ការិនីក្នុងកម្មវិធីធំៗ តែខ្ញុំក៏ធ្លាប់មានបទពិសោធលើអាជីពនេះមួយចំនួនធំមកហើយដែរ ហើយមុននេះខ្ញុំក៏ធ្លាប់ធ្វើជាពិធីការិនីនៅស្ថានីយទូរទស្សន៍ អប្សរាបានមួយរយៈដែរ»។ទោះអះអាងថា អាជីពថ្មីមិនធ្វើឲ្យនាងលំបាក តែ ម៉ាយ៉ាវីន ក៏បានទទួលស្គាល់ផងដែរថា ការចាប់អាជីពជាពិធីការិនីនេះមានការលំបាកជាងការច្រៀង ព្រោះថា នាងត្រូវចេះរៀបចំខ្លួន ត្រូវយល់ និងចេះប្រើពាក្យពេចន៍ធ្វើយ៉ាងណាឲ្យត្រូវនឹងបរិបទនៃកម្មវិធី ពិសេសការបត់បែនតាមពេលវេលា និងស្ថានភាព។
កាល ពីកន្លងមកតែងល្បីថា តារាចម្រៀងពេលរាត្រីរូបនេះ ជានារីសម្បូរស្នេហ៍ ហើយមានកន្លង់នៅក្នុង និងក្រៅស្រុកមិនតិចទេ ដែលប្រាថ្នាចង់បានតារារូបនេះមកគ្រង់ជាម្ចាស់បេះដូង ប៉ុន្តែនៅពេលជួបផ្តល់បទសម្ភាសជាមួយ ភ្នំពេញ ប៉ុស្តិ៍ បែរជាតារាស្រីសម្តីផ្អែមរូបនេះ ត្អូញត្អែរដកដង្ហើមធំហើយនិយាយថា នាងប្រាថ្នាចង់បានម្ចាស់ស្នេហ៍ចិត្តស្មោះសម្នាក់តែរកមិនបាន សោះ។
តារាដែលធ្លាប់តែស្លៀក ពាក់សិចស៊ីម្នាក់នេះ បាននិយាយតម្អូញថា៖«ខ្ញុំមានអាយុកាន់តែច្រើនហើយ ខ្ញុំចង់មានគូគាប់ភ្ជាប់និស្ស័យដូចគេឯងដែរ តែមិនដឹងថា យ៉ាងម៉េចទេ គ្មានអ្នកណាគេមើលឃើញសោះ»។ នាងបានបន្តថា៖«បើនិយាយអួតបន្តិចទៅរូបសម្ផស្សខ្ញុំក៏ ស្រស់ស្អាត ហើយជាតារាចម្រៀងមួយដួងមានកេរ្តិ៍ឈ្មោះល្បីគួរ សមដែរ តែហេតុអ្វីរកប្តីមិនបាន? ឬមួយក៏ព្រហ្មលិខិតមិនទាន់កំណត់វាសនាផ្តល់គូព្រេង ឲ្យ? នេះមិនមែនបានន័យថា គ្មានគេមកសុំស្នេហានោះទេគឺ មានច្រើនណាស់ដែរ តែភាគច្រើនបុរសនោះមានអាយុក្មេងជាងនាងខ្ញុំ ហើយនាងខ្ញុំបដិសេធមិនទទួលទេ»។
គួរ បញ្ជាក់ថា ជុំ ម៉ាយ៉ាវីន បានហក់ចូលប្រឡូកក្នុងវិស័យសិល្បៈចម្រៀងរយៈពេល១០ឆ្នាំហើយ ពោលគឺតាំងពីឆ្នាំ២០០២ តែតារារូបនេះមិនទាន់មានសំណាងបានថតសំឡេងចូលស៊ីឌី ឬមានបទខ្លួនឯងផ្ទាល់ដូចអ្នកចម្រៀងដទៃទៀតនៅឡើយ។ ទោះបីជាយ៉ាងនេះក្តី ក៏តារាស្រីរូបនេះអាចរកលុយចិញ្ចឹមជីវិតឲ្យមានភាពហ៊ឺហាជាង មុន និងប្តូរពីជួលផ្ទះគេមកមានផ្ទះខ្លួនឯងផ្ទាល់ និងមានរថយន្តទំនើបជិះយ៉ាងសមរម្យទៀតផងនាពេលបច្ចុប្បន្ន៕
ដកស្រង់ពីៈ ភ្នំពេញប៉ុស្តិ៍
