ភ្នំពេញៈ មកទល់នឹងពេលនេះ តារាចម្រៀងស្រីវ័យក្មេង ដែលធ្លាប់តែបង្ហើរសំនៀងយ៉ាងពីរោះរណ្តំ នាង សុខ ពិសី នៅតែបន្តបាត់ខ្លួនយ៉ាងអាថ៌កំបាំងដដែល បើទោះបីជាមានប្រភពជាច្រើនបានអះអាងខុសៗគ្នាពីវត្តមានរបស់ នាងក៏ដោយ ដែលខ្លះថា នាងទៅអាមេរិក ខ្លះថា នាងចេញទៅរៀនសូត្រផ្នែកកែសម្ផស្សនៅប្រទេសសិង្ហបុរី ហើយខ្លះទៀតថា នាងនៅក្នុងស្រុកខ្មែរ។
ការបាត់ខ្លួន សុខ ពិសី ពីឆាកតន្ត្រី ត្រូវបានគេមើល ឃើញថាមានរយៈពេល ជាងមួយខែមកហើយ ដែលបញ្ហានេះបានធ្វើឲ្យមជ្ឈដ្ឋានអ្នកគាំទ្រមានការភ្ញាក់ផ្អើល យ៉ាងខ្លាំង ខណៈដែលសុខៗតារាក្នុង បេះដូងរូបនេះបាត់ខ្លួនដោយមិនបានផ្តល់ព័ត៌មានអ្វីសូម្បី បន្តិចនោះ។
កាលពីប្រមាណជាងមួយខែមុន ក្រុមគ្រួសាររបស់តារាចម្រៀងសាច់សខ្ចី សុខ ពិសី ធ្លាប់ឲ្យដឹងថា សុខ ពិសី គ្រោងនឹងចេញទៅសម្តែងច្រៀងនៅសហរដ្ឋអាមេរិក ប៉ុន្តែកន្លងបានប៉ុន្មានសប្តាហ៍ តារារូបនេះក៏មិនមានវត្តមាននៅអាមេរិកដែរ ពោលគឺអ្វីៗគ្រាន់តែជាការឆ្លើយបង្ហើរចោលតែប៉ុណ្ណោះ ប៉ុន្តែនាងបែរជាអវត្តមានពីឆាកតន្ត្រីយ៉ាងស្ងប់ស្ងាត់។
ជុំវិញភាពមន្ទិលនៃការបាត់មុខគួរឲ្យសង្ស័យនេះ បែរជានៅពេលនេះ មានប្រភពពីរបានអះអាងផ្សេងៗគ្នា។ ប្រភពនៅកន្លែងបម្រើការងាររបស់នាងបានអះអាងថា តារាចម្រៀងជ្រកក្រោមទ្រនំយ៉ាងសុខសាន្តរបស់ផលិតកម្មសាន់ដេ សុខ ពិសី បានចេញទៅប្រទេសសិង្ហបុរីកាលពីមួយខែមុននេះ ហើយនាងនឹងចំណាយពេលយូរគួរសមនៅប្រទេសមួយនោះ ដើម្បីហាត់រៀនពីវិធីកែសម្ផស្សបែបទំនើប។ ប៉ុន្តែផ្ទុយពីការអះអាងរបស់អ្នកគ្រប់គ្រងរបស់នាង បែរជាថ្មីនេះ មានប្រភពមួយបានអះអាងថា រូបគេបានឃើញវត្តមានរបស់តារាចម្រៀងនាង សុខ ពិសី បើករថយន្តទំនើបយ៉ាងត្រជាក់ចិត្តនៅរាជធានីភ្នំពេញ។
ពាក់ព័ន្ធនឹងមន្ទិលនៃការបាត់ខ្លួនរបស់តារាចម្រៀងស្រីល្បីឈ្មោះ ឈរលំដាប់កំពូលរូបនេះ លោក ឡាយ សុខចំរើន នាយកគ្រប់គ្រងផលិតកម្មសាន់ដេ បានឲ្យដឹងថា សព្វថ្ងៃនេះ សុខ ពិសី កំពុងស្ថិតនៅប្រទេសសិង្ហបុរី ជាមួយនឹងគ្រួសាររបស់នាង។ លោកបានបន្តថា សុខ ពិសី មិនមានបាត់ខ្លួនទៅណាឡើយ តែអវត្តមានរបស់នាងនៅពេលនេះ គឺជាការចំណាយពេលដើម្បីពង្រឹងអាជីពរបស់ខ្លួនទៅវិញ។
ម្ចាស់ផលិតកម្មសាន់ដេរូបនេះបាននិយាយថា៖«សុខ ពិសី គាត់បានដាក់ច្បាប់មកក្រុមហ៊ុនសុំច្បាប់ពីការងាររយៈពេល៣ខែ ដោយនាងបានបញ្ជាក់ថា នាងទៅប្រទេសសិង្ហបុរី ដើម្បីរៀនពីវិជ្ជាកែសម្ផស្ស។ ខ្ញុំមិនច្បាស់ដែរ តែប្រហែលជានាងកំពុងស្ថិតនៅទីនោះជាមួយនឹងគ្រួសារគាត់ ព្រោះភាគច្រើនគាត់ទៅណាមកណាជាមួយគ្រួសារ»។
ទន្ទឹមនឹងការអះអាងថា សុខ ពិសី កំពុងស្ថិតនៅយ៉ាងស្ងប់ស្ងាត់នៅប្រទេសសិង្ហបុរីនោះ ក៏មានការលើកឡើងរបស់ប្រភពមួយថា តារារូបនោះអាចនឹងសំងំលាក់ខ្លួនព្យាបាលជំងឺអាលាក់ស៊ីស្បែកធ្ងន់ធ្ងររបស់នាង ប៉ុន្តែការបង្ហើបប្រាប់នេះបែរជាត្រូវបានលោក ឡាយ សុខចំរើន បដិសេធជាថ្មីម្តងទៀត។
លោកបានអះអាងបញ្ជាក់ថា មិនមានរឿងអាក្រក់បែបនេះកើតឡើងចំពោះតារាចម្រៀង សុខ ពិសី ដ៏ស្រស់ស្អាតនោះឡើយ។
លោកនិយាយថា៖«មុនហ្នឹងខ្ញុំដូចជាមិនបានដឹង ហើយក៏មិនបានឃើញ គាត់មានកើតជំងឺនេះដែរ និយាយទៅគឺគាត់អត់មានជំងឺបែបនេះទេ គាត់ទៅរៀនជំនាញតែប៉ុណ្ណោះ ព្រោះពេលគាត់ត្រឡប់មកវិញ គាត់គ្រោងនឹងបើកហាងកែសម្ផស្សធំមួយ»។
ទោះមានការអះអាងស្ទើរច្បាស់ការណ៍១០០ភាគរយថា សុខ ពិសី ពិតជាស្ថិតនៅលើដែនដីសិង្ហបុរីក៏ដោយ តែមិនប្រាកដថា ការនិយាយក្តែងៗនោះ ជាការពិតនោះដែរ ខណៈពេលថ្មីៗនេះ គេបានឃើញវត្តមានតារាចម្រៀងនាង សុខ ពិសី បើករថយន្តម៉ាកទំនើបពេញរាជធានីភ្នំពេញនោះ។
សារព័ត៌មានក្នុងស្រុកមួយបានឲ្យដឹងដោយយោងតាមប្រភពឃើញច្បាស់ ផ្ទាល់នឹងភ្នែកថា គេបានឃើញសុខ ពិសី បើករថយន្តទំនើបម៉ាក Rang Rover ពណ៌សឈប់នៅស្តុបបូកគោ ខណៈពេលមានការអះអាងថា នាងកំពុងស្ថិតនៅប្រទេសសិង្ហបុរីដើម្បីក្រេបជញ្ជក់យកចំណេះជំនាញ ផ្នែកកែសម្ផស្សនោះ។ ប្រភពនោះបញ្ជាក់ថា រូបគេប្រាកដណាស់ នោះគឺសុខ ពិសី ១០០ភាគរយ។
ទន្ទឹមនឹងការនិយាយថា សុខ ពិសី សំងំនៅស្រុកខ្មែរនេះ លោក ស៊ឹម សុរ៉ាមភូមិ ដែលជាអ្នកជិតដិតបំផុតរបស់សុខ ពិសី បានឲ្យដឹងថា សុខ ពិសី មិនបានចេញទៅក្រៅនោះទេ តែលោកបានបញ្ជាក់ថា លោកមិនសូវបានជួបនឹង សុខ ពិសី ទេមួយរយៈចុងក្រោយនេះ។
ទោះបីជាយ៉ាងណា ការបាត់មុខ សុខ ពិសី នេះ នៅតែស្ថិតជាចម្ងល់នៅឡើយ ហើយគេកំពុងរង់ចាំថា នៅរយៈពេលដ៏ខ្លីខាងមុខនេះ សុខ ពិសី នឹងបកស្រាយបែបណាប្រាប់ទស្សនិកជន៕
- ប្រភព ភ្នំពេញប៉ុស្តិ៍
