កាលពីរសៀលថ្ងៃទី២៣ ខែតុលា ឆ្នាំ២០១២ លោក សេង នាង ចៅក្រមជំនុំជម្រះរបស់តុលាការ សាលាដំបូងរាជធានីភ្នំពេញ បានបើកសវនាការជំនុំជម្រះ និងប្រកាសសាលក្រមសម្រេចផ្តន្ទាទោស ស្ត្រីចិន ជាមេការរោងចក្រកាត់ដេរ ដែលខឹងនឹងកម្មករ រួចចាប់កន្ត្រាក់ ហែកចោល និងកាត់ព្រះឆាយាលក្ខណ៍ព្រះមហាវីរក្សត្រ។
បន្ទាប់ពីបើកសវនាការជំនុំជម្រះ ចាប់តាំងពីម៉ោង ២ រសៀល រហូតដល់ព្រលប់ថ្ងៃនេះ ចៅក្រមបានសម្រេចដាក់ពន្ធនាគារ ១ឆ្នាំ តែព្យួរទាំងអស់ និងពិន័យជាប្រាក់ ២ លាន ៥ សែនរៀល ពីបទធ្វើឱ្យខូចខាត ដោយចេតនាព្រះឆាយាលក្ខណ៍ ព្រះបរមសពសម្តេចព្រះ នរោត្តម សីហនុ។ ចៅក្រមក៏បានសម្រេចបណ្តេញស្ត្រីចិននោះ ចេញពីព្រះរាជាណាចក្រកម្ពុជា ដោយយោងតាមមាត្រា ៤១០ ,១០៧ និង៤២២ នៃក្រមព្រហ្មទណ្ឌ។
ស្ត្រីជនជាតិចិនរូបនោះ ឈ្មោះ វ៉ាង សៀវជីវ ( Wang Zia Chao ) អាយុ ៤១ឆ្នាំ ជាមេការរោងចក្រកាត់ដេរ ថបវើលដ៍ ហ្គាមែន (ខេមបូឌ៊ា) អិលធីឌី។ ស្ត្រីចិននោះ ត្រូវបានអាជ្ញាធរ និងប៉ូលិសរាជធានីភ្នំពេញ ចាប់វ៉ៃខ្នោះ នាំខ្លួនមកសាកសួរករណីហែក និងកាត់ព្រះឆាយាលក្ខណ៍ព្រះបរមសពសម្តេចព្រះ នរោត្តម សីហនុ កាលពីថ្ងៃទី២២ ខែតុលា ឆ្នាំ២០១២។ ស្ត្រីចិននោះ ត្រូវបានប៉ូលិសបញ្ជូនទៅកាន់តុលាការ នៅព្រឹកថ្ងៃទី២៣ ខែតុលា ឆ្នាំ២០១២ ហើយតុលាការក៏បានបើកសវនាការ នៅពេលរសៀល ដើម្បីបិទបញ្ចប់សំណុំរឿងក្តីដ៏រស៊ើបនោះ។
គួររំលឹកថា កម្មករកម្មការិនី នៅរោងចក្រកាត់ដេរ ថបវើល ដែលមានទីតាំងស្ថិតនៅភូមិជ្រោយអំពិល សង្កាត់ក្បាលកោះ ខណ្ឌមានជ័យ បាននាំគ្នាទៅមើលរូបព្រះឆាយាលក្ខណ៍សម្តេចតា ក្នុងម៉ោងធ្វើការ ក្នុងរោងចក្រ នាំឲ្យស្ត្រីមេការជនជាតិចិន ទប់អារម្មណ៍ខឹងមិនបាន ក៏ចាប់ហែកចោលនូវរូបព្រះឆាយាលក្ខណ៍ព្រះបរមសពសម្តេចព្រះ នរោត្តម សីហនុ។
ក្រោយហេតុការណ៍នោះ នាំឲ្យកម្មករ កម្មការិនីជិត ១.០០០ នាក់ បាននាំគ្នាធ្វើបាតុកម្មតវ៉ា កាលពីព្រឹកថ្ងៃទី២២ ខែតុលា ឆ្នាំ២០១២៕
ប្រភព: សារព័ត៌មាន CEN
