ភ្នំពេញ: លោក គង់ សុខម៉េង ជាថៅកែស៊ុបស៊ូគី កាកា នៅកោះពេជ្រ បានប្រលោមនាង មឿន សុខនី ហៅ ផាន់ ម៉ូនីកា តារាចម្រៀងស្រីរបស់ផលិតកម្មសាន់ដេ យកទៅរៀបការជាមួយបាត់ទៅហើយ។
អាពាហ៍ពិពាហ៍ពួកគេ កាលពីយប់ថ្ងៃទី១៧ ខែមីនា ឆ្នាំ២០១៣ នៅអគារកោះពេជ្រ បានអញ្ជើញភ្ញៀវចូលរួម៧០តុឯណោះ ដោយមានសិល្បករ សិល្បការិនីមកចូលរួមច្រើន លើកលែងតែលោក ខេមរៈ សិរីមន្ត ដែលសម្ងំសម្រួលអារម្មណ៍ ក្រោយជួបហេតុការណ៍រន្ធត់គ្រោះថ្នាក់ចរាចរ។
គេជឿថា មុខរបរហាងស៊ុបស៊ូគីនៅកោះពេជ្រឈ្មោះ “កាកា ស៊ូគី” ដែលបោះទុនជាច្រើនម៉ឺនដុល្លារអាមេរិកនោះ នឹងធ្វើឲ្យតារាចម្រៀងរូបនេះរវល់ជាក់ជាមិនខាន មិនដឹងថានាងអាចបន្តច្រៀងបានទៀតដែរឬអត់។
ពិតជាសំណាងរបស់នាង ផាន់ ម៉ូនីកា ដែលបានសាងអនាគតជាមួយ លោក គង់ សុខម៉េង ដែលជាកូនប្រុសក្នុងគ្រួសារសែស្រឡាយចិន ពូកែរកស៊ីយ៉ាងនេះ៕
