ប្រភព៖ ទស្សនាវដ្តីខ្មែរអប្សរា, ដោយ៖ ឡេង សុជាតា
បន្ទាប់ពីបានឃើញកញ្ញា គឹម លីហ្សា បង្ហោះរូបថតរបស់ នាង ដែលស្និទ្ធស្នាលជាមួយបុរសម្នាក់រស់នៅអូស្ត្រាលី តាម រយៈ ធាចបៀកៀ មកមានអ្នកខ្លះបានគិតថា បុរសម្នាក់នោះ ប្រហែលជាសង្សារថ្មី និងចុងក្រោយរបស់នាងហើយ បន្ទាប់ពី បានលេចឮថា នាងផ្តាច់ទំនាក់ទំនងស្នេហាជាមួយលោក អេឡិច ចិន្ត្រា ។ ថ្មីនេះបានលេចឮថា គឹម លីហ្សា មានគម្រោង ចូលរោងការនៅក្នុងពាក់កណ្តាលឆ្នាំ២០១៣ខាងមុខនេះ ហើយ បុរសដែលគេសង្ស័យថា ជាគូរអនាគតរបស់នាង គឺជាបុរស ដែលថតស្និទ្ធស្នាលជាមួយគ្នាបង្ហោះនៅក្នុង ធាចបៀកៀ នោះ ហើយ ។ប្រហែលជាកន្លះឆ្នាំមកហើយដែល គឹម លីហ្សា បានបង្ហាញ រូបថតបុរសម្នាក់នោះតាមរយៈ ធាចបៀកៀ បន្ទាប់ពីលេចឮថា នាងបាន បញ្ចប់ទំនាក់ទំនងជាមួយលោក អេឡិច ចិន្ត្រា ។ តាមការលើកឡើង របស់អ្នកដែលបានស្គាល់បុរសម្នាក់នោះបានអះអាងថា កន្លងមក គឹម លីហ្សា និងបុរសម្នាក់នោះ មិនត្រឹមតែធ្លាប់ដើរកម្សាន្តជាមួយគ្នានៅក្នុង ស្រុកខ្មែរនោះទេ គឺថែមទាំងធ្លាប់ចេញទៅលេងនៅប្រទេសជិតខាង ថែមទៀតផង ។ប្រភពដដែលបានលើកឡើងទៀតថា បុរសម្នាក់នោះឈ្មោះ ធី ជា កូនរបស់មន្ត្រីរាជការម្នាក់ មានមុខមាត់ក្នុងសង្គម ហើយបុរសម្នាក់នោះ ចាកចេញពីស្រុកខ្មែរ ទៅរស់នៅប្រទេសអូស្ត្រាលី បានប្រហែលជាង៣ ឆ្នាំហើយ ។ លោក ធី មិនធ្លាប់បានរៀបការនោះទេ ហើយបានមកស្រុក ខ្មែរកាលពីអំឡុងពិធីបុណ្យភ្ជុំបិណ្ឌឆ្នាំ២០១២ ដើម្បីដើរកម្សាន្តជាមួយ គឹម លីហ្សា ។
ពាក់ពន្ធ័នឹងរឿងនេះ គឹម លីហ្សា បាននិយាយប្រាប់ទាំងភ្ញាក់ផ្អើលថា ខ្ញុំឆ្ងល់ដល់ហើយបង! តើពួកគេបានដឹងរឿងនេះមកពីណា? ទើបបានជា ថ្មីៗនេះ អ្នកដែលស្គាល់ខ្ញុំម្នាក់ៗ នាំគ្នាខលមកសួរខ្ញុំរហូត ដែលខ្ញុំខ្លួនឯង អត់បានទាំងដឹងខ្លួនផងហ្នឹង (សើច) ។
គឹម លីហ្សា បានបន្ថែមទៀតថា ក្រែងលោគេយល់ច្រឡំខ្ញុំជាមួយ កញ្ញា អាលីហ្សា ទេដឹង? ព្រោះនាងប្រហែលជារៀបការក្នុងឆ្នាំ២០១៣នេះ ហើយ! ។ ចំណែកខ្ញុំវិញ គឺអត់មានទេ ហើយបើមានមែននោះ ខ្ញុំទៅលាក់ លៀមធ្វើអ្វី បើគ្រាន់តែរឿងរៀបការហ្នឹង! ហើយបើសង្ស័យថា ខ្ញុំមាន គម្រោងរៀបការជាមួយបុរសម្នាក់ដែលរស់នៅប្រទេសអូស្ត្រាលីនោះ គឺ ប្រហែលជាមិនអាចនោះទេ ។ រវាងគាត់និងខ្ញុំ គឺរាប់អានគ្នាដូចជាបង ប្អូនអ៊ីចឹង ។
នាងបន្តថា កន្លងមកពួកយើងបានដើរកម្សាន្តជាមួយគ្នាមែន នៅ ក្នុងស្រុកខ្មែរ ដោយសារការរាប់អាននោះ មានតាំងពីពួកយើងនៅក្មេងៗ មកម្ល៉េះ ព្រោះខ្ញុំនិងប្អួនរបស់គាត់ជាមិត្តភ័ក្តិនឹងគ្នារៀនជាមួយគ្នា។ ធម្មតា ខ្ញុំជាតារាសិល្បៈ ប្រសិនបើស្និទ្ធស្នាលជាមួយបុរសណាម្នាក់ គឺច្បាស់ជា មានគេចាប់អារម្មណ៍គិតថា ជាសង្សារនឹងគ្នាមិនខានឡើយ ។ ដូចជាខ្ញុំ និងលោក អេឡិច ចិន្ត្រា អ៊ីចឹង ពេលដែលចាប់ដៃគូរជាមួយគ្នាក្នុងការ សម្តែងនរណាក៏ថា យើងទាំងពីរនាក់ជាសង្សារនឹងគ្នាដែរ ។ ក្រោយមកនៅពេលដែលពួកយើងលែងទៅណាមកណា ជាមួយគ្នា ក៏គ្មាននរណាចាប់អារម្មណ៍ទៀតដែរ ។
ទោះបីជា គឹម លីហ្សា បានបដិសេធថា នាងគ្មានពិធី មង្គលការកើតឡើង ដូចពាក្យគេលេចឮក៏ដោយ តែនាង មិនហ៊ានសន្យាទេថា មង្គលការរបស់នាងនឹងមិនកើត ឡើងក្នុងឆ្នាំ២០១៣នោះឡើយ ។ នាងនិយាយថា ឱ្យខ្ញុំសន្យា យ៉ាងម៉េចបង! ព្រោះមង្គលការគ្មាននរណាមើលឃើញ នោះទេ ជួនកាលខ្ញុំនិយាយថា អត់មានរៀបការក្នុងឆ្នាំនេះ ទេ តែលុះដល់ពីរទៅបីខែខាងមុខទៀត ស្រាប់តែខ្ញុំស្គាល់ បុរសណាម្នាក់ ហើយចំណែកចាស់ទុំក៏ត្រូវរ៉ូវគ្នាទៅទៀត រួចរៀបចំមង្គលការតែម្តង ។ ហេតុផលនេះហើយដែលខ្ញុំ មិនហ៊ានសន្យាទេ ខ្លាចខុសសម្តីខ្លួនឯង ៕
