ទុក្ខ​ផ្ទួនៗ​​​គ្រោះ​ថ្នាក់​២​​ករណី​ជាប់​គ្នា​ សម្លាប់​មនុស្ស​៦​នាក់ របួស​ប្រមាណ​១០​នាក់ នៅ​កន្លែង​តែមួយ​​ដែល​រថយន្ត​ធុនត្រា​របស់​តារា​ចម្រៀង ​ខេមរៈ សេរី​មន្ត​ ជួប​គ្រោះ​ថ្នាក់ (Video)

ព្រះសីហនុ៖ ទុក្ខផ្ទួនៗជាប់ៗគ្នា ករណីគ្រោះថ្នាក់ចរាចរ ២លើក កើតឡើងនៅចំណុចតែមួយ បណ្ដាលឲ្យ មនុស្ស ៦នាក់ បានស្លាប់ បាត់បង់ជីវិត និងរបួសប្រមាណ ១០នាក់ ជាទីកន្លែងដែលរថយន្តធុនត្រារបស់តារាចម្រៀង ខេមរៈ សេរីមន្តជួបគ្រោះអាក្រក់នោះ។ ខណៈពេលកំពុងរៀបចំអន្តាគមន៍នៅកន្លែងកើតហេតុ ក៏មានរថយន្តធុនធំដឹកស្រាបៀរមួយគ្រឿងទៀត បុកមនុស្សបន្តគ្នាបណ្ដាលឲ្យ ស្លាប់ម្នាក់នៅនឹងកន្លែង និងស្លាប់ម្នាក់ទៀតនៅមន្ទីរពេទ្យ ព្រមទាំងរបួស៥នាក់ផ្សេងទៀត។

ប្រភពព័ត៌មានបានឲ្យដឹងថា គ្រោះថ្នាក់ចរាចរដ៏អាក្រក់នោះកើតឡើងនៅវេលាម៉ោង ៩និង៣៥នាទី យប់ថ្ងៃទី៧ ខែមិនា ឆ្នាំ២០១៣ នៅចំណុច ឃុំបិតត្រាំង ស្រុកព្រៃនប់ បង្កដោយរថយន្តកុងតឺន័រពាក់ស្លាកលេខ ភ្នំពេញ 3A-9723 ធ្វើដំណើរបញ្ច្រាសទិសគ្នាបានបុក ជាមួយរថយន្តម៉ាកធុនត្រាពណ៌ស ពាក់ស្លាកលេខភ្នំពេញ 2N-7997 ធ្វើដំណើរដោយតារាចម្រៀង ខេមរៈ សេរីមន្ត និងក្រុមសម្ដែង សរុបចំនួន៧នាក់ ត្រូវបានរថយន្តកុងតឺន័របុកនិងកិនប៉ែកខាងឆ្វេងបណ្ដាលឲ្យមនុស្សជិះក្នុងរថយន្តធុនត្រាស្លាប់ចំនួន៤នាក់ ក្នុងនោះ មានកូនប្រុសលោកជួង ជី តារាកំប្លែងនាយកុយមួយរូបនិងកូនរបស់តារាកំប្លែងយាយ ណយ សំណាង មួយរូបផងដែរ។ ឯតារាចម្រៀង ខេមរៈ សេរីមន្ត និងក្រុមសម្ដែង២នាក់ទៀតបានរងរបួសធ្ងន់ស្រាល។

ប្រភពបន្តថា ខណៈពេលកំពុងរៀបចំសណ្ដាប់ធ្នាប់នៅកន្លែងគ្រោះថ្នាក់ដ៏អាក្រក់នោះ ស្រាប់តែមានរថយន្តដឹកស្រាបៀរធុនធំមួយគ្រឿង ទៀត បានធ្វើដំណើរពីខេត្តព្រះសីហនុ ក៏បុកមនុស្សដួលរេលបន្តទៀត បណ្ដាលឲ្យមនុស្សម្នាក់ស្លាប់នៅនឹងកន្លែង និងម្នាក់ទៀតស្លាប់ នៅមន្ទីរពេទ្យ ឯមនុស្ស៥នាក់ទៀតក្នុងនោះមានប៉ូលិសផងនោះបានរងរបួសធ្ងន់ស្រាល។

ប្រភពព័ត៌មានបានឲ្យដឹងទៀតថា សរុបគ្រោះថ្នាក់ចរាចរ២ករណីជាប់ៗគ្នានោះ បណ្ដាលឲ្យមានមនុស្សស្លាប់ចំនួន៦នាក់ និងប្រមាណ ជិត១០នាក់ទៀតរងរបួសធ្ងន់ស្រាល៕
ប្រភព៖ គេហទំព័រសារព័ត៌មាន កម្ពុជាថ្មី

សូមជួយផ្តល់មតិ និងចែករំលែក