ភ្នំពេញ: តារាចម្រៀង ញញឹមស្រស់ រូបសង្ហា សុគន្ធ ថេរ៉ាយុ នឹងជួបជាមួយនាយពែកមីដំបូងក្នុងឱកាសចូលឆ្នាំថ្មីខាងមុខដែលកំពុងតែរំកិលខ្លួនចូលមកតាមរយៈបទ “ឪក៏យ៉ាប់ កូនក៏យ៉ាប់”។
បន្ទាប់ពីចេញបទចម្រៀងប្រជាប្រិយខ្មែររីករាយក្នុងការរាំកម្សាន្តក្នុងឱកាសបុណ្យចូលឆ្នាំខ្មែរហើយនោះ តារាចម្រៀងរូបស្រស់នេះបានកំពុងត្រៀមខ្លួនដើម្បីស្វាគមន៍ថតស្ប៉តពាណិជ្ជកម្មពីរទៀត។
ជួបជាមួយស៊ីអ៊ីអិន (CEN) តាមទូរស័ព្ទ តារាវ័យ ២៣ ឆ្នាំរូបនេះបានឲ្យដឹងថា “ក្នុងឱកាសបុណ្យចូលឆ្នាំថ្មីប្រពៃណីខ្មែរខាងមុខនេះ ខ្ញុំមានចម្រៀងបីបទសម្រាប់បម្រើ ទស្សនិកជន ដែលជាបទប្រពៃណីខ្មែរ មានចំណងជើង’សង្សារឆ្នាស” “បារាំងថាយ៉ាប់” “ឪក៏យ៉ាប់ កូនក៏យ៉ាប់” ចំណែកបទទី៣នោះខ្ញុំឆ្លើយឆ្លងជាមួយបងពែកមី។
ថេរ៉ាយុ បន្តថា “សម្រាប់ដើមឆ្នាំនេះ ខ្ញុំទទួលបានស្ប៉តពាណិជ្ជកម្មពីរដែលគេកំពុងតែទាក់ទង តែមិនទាន់បានចុះកុងត្រាជាមួយគ្នាទេ ត្រូវចាំដល់ចូលឆ្នាំហើយទើបដឹងដំណឹងម្តងទៀត”។
សុគន្ធ ថេរ៉ាយុ ឈានជើងចូលអាជីពជាអ្នកសិល្បៈនៅក្នុងឆ្នាំ ២០០៧។ ការប្រឡូកចូលដំបូង ថេរ៉ាយុ មានអាជីពជាតារាចម្រៀង។ មូលហេតុដែលនាំឲ្យលោកប្រឡូកចូលជាអ្នកសិល្បៈដោយមានការស្រឡាញ់ពេញចិត្តតាំងពីតូច។ បទដែលទទួលបានការគាំទ្រយ៉ាងច្រើនកុះករនិងល្បីសម្រាប់តារាវ័យក្មេងរូបនេះរួមមានបទ “ប៉ាប៉ាកូនចង់បានប្រពន្ធ” បទ “បងឡប់ៗស្រឡាញ់អូនដល់ថ្នាក់ហ្នឹង” “កាត់ចិត្តបែបណាបើបងនៅតែស្រឡាញ់ស្រី” តាមរយៈបទបនោសញ្ចេតនាទាំងអស់នេះ បានជ្រោងឲ្យតារាចម្រៀងប្រុសប្រចាំផលិតកម្មថោនរូបនេះទទួលបានប្រជាប្រិយភាព៕
