លោក ប៉ា ងួនទៀង នាយកប្រតិបត្តិនៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ បានថ្លែងថា៖ «យើងមានការសោកស្តាយចំពោះអវត្តមានរបស់គណបក្សសំខាន់ៗ ទាំងនោះដោយការមិនចូលរួមរបស់ពួកគេវាមានន័យថា ពួកគេមិនផ្តល់តម្លៃចំពោះក្តីបារម្ភក៏ដូចជាសំណូមពរ របស់ប្រជាពលរដ្ឋឡើយ»។
អ្នកវិភាគនយោបាយ លោក កែម ឡី ដែលបានសម្របសម្រួលកិច្ចពិភាក្សានោះ បានថ្លែងថា បើទោះបីជាវាយឺតពេលសម្រាប់ក្តីបារម្ភ របស់សាធារណជនដែលត្រូវយកមកដោះស្រាយក្តីគណបក្សនយោបាយអាច«ឮសំឡេង ពីប្រជាជន»នៅក្នុងវេទិកានេះ។ បញ្ហាក្តីបារម្ភទាំងនោះរួមមានការអំពាវនាវឲ្យមានវិសោធនកម្មចំពោះ ច្បាប់បោះឆ្នោតនិងកំណែទម្រង់អ្នកចុះបញ្ជីអ្នកបោះឆ្នោតជាដើម។ លោកថ្លែងថា៖ «ខ្ញុំគិតថា ពួកគេត្រូវតែចែករំលែកទស្សនៈរបស់ខ្លួនដើម្បីជជែកវែកញែកជាមួយ មន្រ្តីអង្គការក្រៅរដ្ឋាភិបាលពលរដ្ឋ និងសាធារណជននៅទីនេះគណបក្សប្រជាជននិងគណបក្សហ៊្វុនស៊ិនប៉ិច ពួកគេត្រូវតែមកហើយយកពេលវេលាមួយចំនួនធ្វើការចែករំលែក និងទឡ្ហីករណ៍ថា តើអ្វីដែលបានកើតឡើងខុសឬត្រូវ»។
អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បានថ្លែងថា គណបក្សប្រជាជន កំពុងផ្តោតទៅលើការធ្វើការងារសម្រាប់ប្រជាជនជាជាងការជជែកគ្នា។ លោកបានថ្លែងថា៖ «វាជាពេលធ្វើការងារមិនមែនជាពេលជជែកទៀតទេ។ ទុកឲ្យគណបក្សដែលចូលចិត្តជជែក ជជែកទៅ ប៉ុន្តែយើងជាគណបក្សប្រជាជន ជាអ្នកធ្វើយើងមិនចំណាយពេលឥតប្រយោជន៍ដើម្បីអង្គុយនិងពិភាក្សា ទេ.យើងមិនមែនធ្វើការដើម្បីភាពល្បីខ្លួនឯងទេប៉ុន្តែយើងធ្វើការ ដើម្បីជីវិតប្រសើរឡើងសម្រាប់ប្រជាជន»។
ដោយអវត្តមានរបស់គណបក្សកាន់អំណាចតំណាងគណៈកម្មាធិការជាតិរៀបចំ ការបោះឆ្នោតលោក កែវ ផល្លា ត្រូវបានវាយប្រហារពីគ្រប់ផ្នែកនិងបានសង្កត់ធ្ងន់ទៅចំណុចដែលថា គ.ជ.ប អនុវត្តទៅតាមច្បាប់ដែលគ្រប់គ្រងយ៉ាងតឹងរ៉ឹង។ លោកថ្លែង បន្ទាប់ពីឆ្លើយសំណួរលំបាកៗ ដែលមានចាប់ពីបញ្ហាសិទ្ធិបោះឆ្នោតរបស់កម្មករចំណាកស្រុករហូតដល់ លទ្ធភាពប្រព័ន្ធផ្សព្វផ្សាយសម្រាប់គណបក្សនយោបាយថា៖ «ហេតុអ្វីអ្នកមិនយល់អ្វីដែលច្បាប់និយាយថាវាលំបាកឲ្យមានការ សន្ទនាដែលប្រកបដោយហេតុផលសូមអានច្បាប់ឲ្យបានច្រើនជាងនេះនៅមុន ពេលអ្នកលើកចំណុចណាមួយ»។ លោកបន្ថែមថា៖ «អ្នកទាំងអស់គ្នាដឹងថា នេះគឺផ្អែកទៅតាមច្បាប់ និងរដ្ឋធម្មនុញ្ញកម្ពុជាសភាគឺជាស្ថាប័នតែមួយគត់ ដែលអាចស្នើឲ្យមានការផ្លាស់ប្តូរច្បាប់គ.ជ.ប មិនអាចធ្វើសេចក្តីព្រាងណាមួយបានទេ»។
តំណាងគណបក្សសង្គ្រោះជាតិលោក អ៊ូ ចាន់រិទ្ធិបានថ្លែងថា ទាំងគ.ជ.ប និងរដ្ឋាភិបាល កំពុងព្យាយាមគេចចេញពីការធ្វើកំណែទម្រង់ការបោះឆ្នោតដោយដាក់ការ ទទួលខុសត្រូវឲ្យគ្នាទៅវិញទៅមក។ លោកបន្ថែមថា៖ «បញ្ហាប្រឈមនេះគឺមិនមែនអំពីការអនុញ្ញាតឬការមិនអនុញ្ញាតនោះទេ ប្រសិនបើមានឆន្ទៈនយោបាយចង់ធ្វើឲ្យមានច្បាប់ប្រសើរខ្ញុំប្រាកដ ថា អ្នកអាចរុញវាចេញបាន»។
ទន្ទឹមនឹងនេះ គណៈកម្មាធិការសម្រាប់ការបោះឆ្នោតដោយសេរី និងយុត្តិធម៌ ហៅកាត់ខុមហ្វ្រែល បានចេញរបាយការណ៍មួយដោយវិភាគកំណត់ត្រាគោលនយោបាយរបស់រដ្ឋាភិបាល ចាប់តាំងពីការបោះឆ្នោតលើកមុន។ ក្នុងចំណោមការសន្យាគោលនយោបាយសរុប៤៨បន្ទាប់ពីការបោះឆ្នោតលើកមុន មានតែគោលនយោបាយចំនួន១០ប៉ុណ្ណោះត្រូវបានចាត់ទុកថាធ្វើឲ្យការ សន្យារបស់ពួកគេ ក្លាយជារូបិយគ្រប់គ្រាន់ដើម្បីវាយតម្លៃដោយ ខុមហ្វ្រែល ដែលរកឃើញថា គោលនយោបាយចំនួន៥ក្នុងចំណោមគោលនយោបាយទាំងនោះត្រូវបានអនុវត្តពេញ លេញក្នុងអំឡុងអាណត្តិទីបួនរបស់គណបក្សប្រជាជន។ គោលនយោបាយជោគជ័យរបស់គណបក្សប្រជាជន រួមមានការធ្វើឲ្យកើនឡើង GDP សម្រាប់មនុស្សម្នាក់លើស៨៧០ ដុល្លារ ការកាត់បន្ថយភាពក្រីក្រយ៉ាងហោចណាស់មួយភាគរយ ក្នុងមួយឆ្នាំនិងការដំឡើងប្រាក់បៀវត្សរ៍ដល់មន្រ្តីរាជការចំនួន ២០ភាគរយក្នុងមួយឆ្នាំ។
គោលដៅដែលធ្វើឲ្យមានភាពរីកចម្រើនមិនគ្រប់គ្រាន់រួមមានការ អប់រំថ្នាក់បឋមសិក្សា ជាចំាបាច់នៅត្រឹមឆ្នាំ២០១០ ការបង្កើតមូលនិធិសន្តិសុខសង្គម និងការរក្សាកំណើនសេដ្ឋកិច្ចចំនួន ៧ភាគរយក្នុងមួយឆ្នាំ។
លោក គល់ បញ្ញានាយកប្រតិបត្តិអង្គការខុមហ្វ្រែល បានថ្លែងថា សមាជិកសង្គមស៊ីវិលអ្នកនយោបាយនិងនិស្សិត៧៥ នាក់ ត្រូវបានអញ្ជើញឲ្យចូលរួមការដាក់ពិន្ទុជាសាធារណៈទៅលើគោលនយោបាយ ដទៃៗដែលមិនអាចត្រូវបានពិនិត្យច្បាស់លាស់ដោយក្នុងនោះ ៦០ ភាគរយនៃអ្នកចូលរួមបានផ្តល់ការដាក់ពិន្ទុអវិជ្ជមានខ្ពស់ទៅលើ គោលនយោបាយដទៃភាគច្រើន។
ទោះយ៉ាងណាក្តី លោក ផៃ ស៊ីផាន បានថ្លែងថា គណបក្សប្រជាជនអាចកាត់បន្ថយភាពក្រីក្រនិងវិសមភាពជំរុញសន្តិសុខ ស្បៀងអាហារនិងការនាំមកនូវសុវត្ថិភាព និងស្ថិរភាពដល់ប្រជាជនកម្ពុជា។ លោកអះអាងថា ៨០ភាគរយនៃប្រជាជនកម្ពុជារីករាយជាមួយរដ្ឋាភិបាល៕
ប្រភពពី ភ្នំពេញ ប៉ុស្តិ៍
